March-ah Redmi Note 7 tlangzarh dawn
Chinese mobile siamchhuaktu lar Xiaomi chuan March thla hian India-ah Redmi Note 7 leh Note 7 Pro tlangzarh hman an tum thu an puang.
Xiaomi hian Redmi Note 7 hi China-ah bik chuan thla hmasa khan an tichhuak tawh a, khawvel hmun dangah pawh February thla hian tichhuah hman an tum. China-ah chuan Redmi Note 7 hi Rs. 10,500 in an hralhchhuak a, India-ah chuan a to deuh dawn a ni.
Redmi Note 7 hian March-ah chuan India a rawn thlen hman beisei a ni. Hemi rual hian Redmi Note 7 Pro pawh tihchhuah nghal tumin company chuan hma an la mek a ni. India-ah chuan Redmi Note 7 hi Rs. 14,600 - 15,700 man vel a ni dawn a, Note 7 Pro erawh hei ai hian a sang hret maithei thung.
Redmi Note 7 hi smartphone chhuak thar zingah chuan mipui ngaihven ber pakhat a ni a, phone man tlawm ṭha bawk si a ni. A camera leh software-te pawhin belhchhian a dawl hle niin an sawi a, hralh pawh a kal leh hle tura ngaih a ni.