Gaga-i'n US president Trump a khak!

American singer Lady Gaga chuan an ram president Donald Trump chu khakin, mipuiten sum leh pai an mamawh em em laia 'shutdown' a titawp duh lo chu a dem thu a sawi. 

'Million Reasons' singer hian kar kalta Inrinni zan khan Las Vegas-ah show a nei a, nikum December 22 aṭanga US sorkarin 'shutdown' a kalpui chungchang a sawi­chhuak. Gaga chuan, "Awmze nei loa mipuite hrekna a ni a, nunphung a khaihlak nasa hle. Mawhphurtu chu kan president Donald Trump hi a ni a, a titawp theitu pawh a ni," tiin, Trump chu shutdown titawp turin a kar. 

Lady Gaga hian vice president Mike Pence pawh chona siamsakin, zirna-ina LGBT-te tana hmun siam sak turin a ti. Gaga chuan "Lesbian, gay, bisexual leh transgender-te hian dikna chanvo an nei a, rah­behsak an ni tur a ni lo. Mike Pence, i nupui pawh school-a thawk a ni a, tinge heti chunga LGBT-te tan hmun a awm ve loh. Kristianna aṭanga thlir pawhin i tidik lo hulhual a ni. Nangmah kha inenfiah la, thil awmdan dik tak chu i hre mai ang." tiin, na takin a dem thu a sawi chhuak a ni. 

Kum 32 mi Lady Gaga chuan US-Mexico ramri hung a nih theih nana hmalakna dodal a nih avanga shutdown kalpui mek hi a sawisel nasa hle a ni.