Pratt leh Katherine-ten inneih thuai an duh

Hollywood star Chris Pratt leh Katherine Schwarzenegger-te chuan inhual thu an puan hnu lawkah, inneih thuai an duh thu an sawi chhuak leh ta. 

'Jurassic World' star Chris Pratt leh Katherine Schwarzenegger-te hi tun thla laihawl khan an inhual a, innei zui mai tura sawi an ni. Hei hi American actor Pratt chuan rawn nemnghetin, innei tura hun rei tak nghah an tum loh thu a sawi. A hun tur erawh a la sawi lang lo thung a, amaherawhchu tun nipui chho hi an tinzawn niin an tarlang. 

Kum 39 mi Chris Pratt hian a nupui hmasa American actress Anna Faris chu nikum lawk khan a ṭhen a, fa pakhat kum ruk mi an nei. An inṭhen hnu hian Austrian-American actor lar Arnold Schwarzenegger-a fanu Katherine Schwarzenegger hi a chhai leh nghal chat a ni. 

Katherine nen hian nikum June vel aṭang khan an inzui ṭan a, thla tam pawh a vei hmain an inhual thu leh inneih thuai an duh thu a thang leh ta a ni.