Lana Del Rey-i'n mass shooting thleng vangin hla thar a siam
US singer Lana Del Rey chuan an rama mass shooting ṭum hnih thleng vangin hla thar a siam phah.
US-ah tunhnaiah darkar 13 chhungin Texas-a El Paso leh Dayton, Ohio-ah inpawngkahna a thleng a, mi 31-in nunna an chan phah a, mi dang eng emaw zatin hliam an tuar. Lana Del Rey chuan pawikhawihna thleng hian a nghawng na hle tih sawiin, hei vang hian hla thar America ram a beiseina, 'Looking for America', tih a siam thar thu a sawi. A hla thar hi a la tichhuak lo a, mahse a producer Jack Antonoff nen studio-a recording an ti lai chu aInstagram-ah a dah lang a ni. "Politician ka ni lo a, nih pawh ka tum hek lo. Mahse hetiang ngaihdan ka lo neih avang hian min hrethiam dawn nia," tiin, an rama inpawngkahna thleng fo leh tunhnai lawka thleng thar leh vang hian a video chu post ngei a duh tih a sawi.
US-a gun control chungchanga politician-te hmalakna sawiseltu musician eng emaw zat an awm a, Rihanna pawhin visa aia AK-47 neih awlsam zawkna ang hialin a sawi. Country star Kacey Mugrave pawhin a fan-te hnenah pawikhawihna thlengah hian politician-te leh president chu mawhphurtua puh turin a ti hial bawk. Cardi B, Chuck D, John Legend leh Billy Ray Cyrus-te pawhin America gun control law chu na takin an sawisel bawk a ni.
Lana hian album thar, 'Norman Fucking Rockwell' tihchhuah tumin a inbuatsaih mek. He album hi Antonoff hian a produce sak dawn a, August 30-a tihchhuah a tum. He album-ah hian single a lo tihchhuah tawh, "Mariners Apartment Complex," "Venice Bitch," "Hope Is a Dangerous Thing for a Woman Like Me to Have — But I Have It," te a tel ang. September thla hian tour a nei dawn bawk.