Emmy Awards-ah host awm dawn lo
Primetime Emmy Awards chuan kuminah host an nei dawn lo tih tarlan a ni.
Producer-te chuan show atana hun tam zawk an pek duh avangin kumin Emmy Awards hi host awm loa buatsaih a ni dawn tih an sawi.
Kumtina sem ṭhin Emmy Awards hi thlaleh mai hian sem a ni leh tawh dawn a, main anchor an awm tawh lo tur nia sawi hian sawizui a hlawh hle thung. Fox Entertainment CEO, Charlie Collier chuan Television Critics Association (TCA) summer press tour-ah hemi chungchang hi sawiin, "Emmy atan hian theihtawp kan chhuah a, mahse kuminah erawh host kan nei dawn lo," a ti.
Collier chuan, Host leh opening number dah a nih chuan minute 15-20 vel hun an la dawn a, chung hun khawhral ai chuan show ṭha tak tak kumina tawp tawh te- 'Game of Thrones', 'Empire', 'Veep' leh 'Big Bang Theory'-te chawimawina atana hman ṭha zawk nia an hriat thu a sawi a ni.
Emmy Awards hian 1975, 1998 leh 2003 kha host nei loin hun an lo hmang tawh a, nikumah erawh kha chuan 'Saturday Night Live' star- Michael Che leh Colin Jost-ten an host thung. Primetime Emmy Awards vawi 71-na hi September 22 hian Microsoft Theater, Los Angeles, California-ah sem a ni ang.
Emmy Awards hi 1949 aṭanga sem ṭan a ni a, a tirah tak chuan 'Emmy Award' tih tawpa sawi a ni ṭhin. Mahse kum 1974 khan a ṭum khatna atan 'Daytime Emmy Award' ceremony hman a nih avangin a thliar hranna atan 'Primetime' tih hi an belh ta a ni.
Academy of Television Arts & Sciences chu a buaipuitu niin, primetime television-a hlawhtling tak takte hnenah chawimawina an hlan ṭhin. July 17 zing khan nomination list tihchhuah a ni tawh a, Game of Thrones chuan nomination 32 zet hmuin record a siam hial. Game of Thrones hian kum 1994-a NYPD Blue-in nomination hmu hnem record a siam chu a rawn khum a ni.