Super Bowl Halftime Show-ah The Weeknd-in fak a hlawh

Khawvela zaithiam leh musician larte tana stage lian ber tih ngam, Super Bowl Halftime show chu nimin zing (Khawthlang ram lamah chuan Pathianni zan) khan neih a ni ta. The Weeknd chuan a hun neih ang tlem te, minute 14 chu thiam takin a hmang a, a hla hit hrang hrang sain show thlirtute beng mai bakah an mit a titlai hle. Lawm a hlawh a, social media lamah fak a hlawh zui nasa.

The Weeknd inlan rualin zaipawlin 'Call Out My Name' an lo sa a, chumi zawhah 'Starboy' hmangin show a rawn hawng. The Hills, Can’t Feel My Face, I Feel It Coming, Save Your Tears, Earned It leh House of Balloons-te a perform hnuah  Blinding Lights hmangin show a khar. 

Raymond James Stadium-a show ropuiah hian The Weeknd hi Blinding Lights leh Save Your Tears-a a inthuam angin, a signature jacket sen nen a inthuam a, Can’t Feel My Face a sak lai leh a Blinding Lights a perform laite hian a inthuam anga inthuam, an hmai bandage-a tuam si tam takin an lampui. Blinding Lights-a a huhoa an lam phei chu hmuhnawm tham tak a ni. Mipui thawm pawh a ring a, an mit leh an beng a tlai tih a chiang.

Kumdang ang chu nise ground laiah stage ropui an siam ang a, The Weeknd perfom-na bulah mipui an pungkhawm ang a, concert ropui tak angin show an buatsaih ang. Mahse kumin zawng hripui leng karah programme an buatsaih miau si a, chutiang chuan an ti thei lo a, stage pawh a sir kil khatah an siam a ni deuh ber mai. A hla hnuhnung bera ground laiah a perform-a, hetah pawh hian bawhbuaitu mipui an awm lo. Kumin hi ground laia stage an siam loh ṭum khatna a ni hial a, hetichung hian The Weeknd hian fak a hlawh viau tho.

Kumdanga performance nen a khaikhin loh theih lo a, kumin erawh Covid-19 vangin stage set up kumdang angin zalen takin an siam thei lo. The Weeknd hian chu chu a hmang ṭangkai a, tunlai thiamna, technology a hmang ṭangkai.

Chu chuan kumdang aia nep chuang bik hauh loin show a buatsaih a tih theih. Variety chuan 'The most technologically dazzling halftime performance in history' tiin The Weeknd performance hi a comment hial.

The Weeknd hian a show a hlawhtlin theihna tur hian a pawisa $maktaduai 7 lai zu han hmang a! 

•    Super Bowl Halftime Show performance atan The Weeknd chuan $mtd 7 lai a hmang.

•    The Weeknd hi Canadian zaithiam Super Bowl Halftime Show-a perform thei pathumna a ni. A hmain Shania Twain leh Dan Aykroyd-te an inlan tawh.

•    Super Bowl Halftime Show-a perform-te hi hlawh pek an ni ngai lo. 

•    Super Bowl LV hi Raymond James Stadium, Tampa-ah neih a ni.

•    Super Bowl LV-ah hian Tampa Bay Buccaneers chuan Kansas City Chiefs an hneh.

-     Call Out My Name

-     Starboy

-     The Hills

-     Can’t Feel My Face

-     I Feel It Coming

-     Save Your Tears

-     Earned It

-     House of Balloons

-     Blinding Lights