Baby Malsawmtluangi pakhatna a ni

Mystical Mizoram Ṭhazual Gospel chart-ah Baby Malsawmtluangi pakhatna a ni a,  'Ka Kawng Hruaitu' hmangin chart-ah ro a rel.

Baby Malsawmtluangi hian nikum October thla khan Ka Kawng Hruaitu hi a tichhuak a, chart-ah a mikhual tawh lo hle. Chart luahlumtu ber zinga mi niin chart-a a lan tirh aṭangin hma a sawn zel a, tunah chuan pakhatna a ni ta a ni.

Lungngaih leh buaina kara kawng hruaitu atan Pathian sawmna hla ṭha tak hi PB Lianzama hla lehlin niin Baby Malsawmtluangi hian a sa thiam a, music video a hmuhnawm bawk nen chart-a pakhatna a ni pawh hi a mak lo hle.

Sailo Lalsangzuali chuan hma sawn zelin pahnihna a ni ta. A hla 'Tuinung lui' hi chart hmasaah khan pathumna a ni a, tunah chuan pahnihnaah rawn inhlangkai tawhin a dinhmun a ṭha sawt viau. Pathumna chu Faktu 'Ṭahna reng a awm tawh lo' pawh palina aṭangin Top 3-ah an inhlangkai ve bawk a, hma an sawn zel a ni.

Lalthlengliani Jongte    'Mifel Awm Khawm' chu palina a ni a, One in Christ 'Min thlah ngai lo' chu Top 5 khartu a ni. Ṭhazual chart top 10-ah hian Cindy, Zualteii, Ruthi leh Maruati te pawh an lang a, One in Christ chuan an hla pahnih lai top 10-ah an lanpui bawk.