Beatles' Abbey Road album photo lak champha vawi 50-na
Kum 50 liam taa Bealtles-ten an album, Abbey Road album photo tur an lak champha pualin Ningani khan London-a an thlalakna hmunah anmahni ngaisangtu ṭhahnem tak an pungkhawm.
Khawvela zebra crossing lar ber tia sawi, music history-a album cover lar ber zinga mi hi kum 1969-a EMI Recording Studios kawt, Abbey Road zebra crossing-a John Lennon, Paul McCartney, George Harrison leh Ringo Starr-te kal lai a ni. Thlalatu hi Scottish photographer Iain Macmillan a ni a, an kawng kan lai hi vawi ruk hmetin, a vawi nga-na a lak chu Beatles studio album 11-na, Abbey Road album cover atan hman a ni ta a ni. He album hi kum 1969,
September 26 khan tlangzarh a ni. He album hi Rolling Stone chhiartute chuan kum 2009 khan Beatles album ṭha berah an lo thlang tawh bawk. Ningani-a Abbey Road-a Beatles fan pungkhawm zinga ṭhenkhat chu kum 50 liam taa Beatles member-te inthuam dan anga inthuamin,an tih dan zirin zebra crossing-ah hian an kal ve a ni.
Record company, Apple Corps/Capitol/UMe-te chuan Abbey Road anniversary pual hian September 27-ah special package tihchhuah an tum a, hetah hian he albuma hla 17 track te, session recording 23 leh demo-te dah a ni ang.
Abbey Road album hi band member paliten an record hnuhnun ber a ni a, 'Let It Be' album chu an album release hnuhnung ber ni mah se, 'Abbey Road' ai hian an record hmasa thung. He album-ah hian member tinte hla siam a awm vek a, chungte chu Lennon-a hla "Come Together", Harrison-a hla "Here Comes the Sun", McCartney hla "Maxwell's Silver Hammer" leh Starr-a hla "Octopus's Garden" te an ni. Abbey Road an release aṭanga kum khat pawh tling loah Beatles hi an kehdarh a ni.