Game Of Thrones creator-te leh NETFLIX-in inremna ziak

Game Of Thrones creator- David Benioff leh DB Weiss-te chu streaming giant Netflix chuan inremna a ziahpui.

News reporter ṭhenkhat chuan Netflix, Amazon leh Disney-te inkara indona awmah Netflix hian hnehna an chang ni ten an sawi hial. 

Netflix hotupa Ted Sarandos chuan thawnthu ziaktu ropuite chu an lo lawm hle tih sawiin, Benioff leh Weiss-te pawhin Netflix chuan thil ropui tak tak leh hmakhalh harsa tak takte an lo tih tawh thu leh, anmahni zawm tura an sawmna chu lawmawm an tih thu an sawi ve bawk.

GOT creator-te leh Netflix inremnaah hian pawisa engzat nge tel tarlan a ni lo. GOT siamtute hian HBO chungah an lawm thu sawi bawkin, kum 10 chuang lai an thawhdunna chu lawmawm an tih thu sawi chungin HBO chu an chhuahsan ta a ni.

Benioff leh Weiss-te hian HBO chhuahsanin Netflix hi zawm tawh mah se Game of Thrones prequel 2020-a tihchhuah tur 'Bloodmoon' tia title an pek lailawk chu an tichhuak dawn tho.

Netflix hian July thla khan an beisei aiin 'paid subscriber' an nei tlem tih an lo sawi tawh a nih kha.  April-June inkar khan customer thar maktaduai 2.7 zet nei mah se hei hian an beisei a pha lo a ni ngei ang. Mahse tunah chuan GOT nasa taka hlawhtlinpuituten an zawm ve leh ta a, hma an sawn leh zual ngei ang.

GOT hian Emmy award 47 dawng tawhin nomination phei chu 160 zet an hmu tawh. Thlaleha Emmy award semna turah pawh TV show hlawhtling berte zingah a tel leh ngei rin a ni bawk.