WCS 2019-ah Mizo Tlangval-ten semi-final thleng
Japan pop culture festival World Cosplay Summit (WCS) 2019, Nagoya, Japan-a neihah India aiawha kal Mizo tlangval pahnih, Dominic Rozamliana Khiangte leh Reuben Zorindika Hnamte-te chuan ‘Cosplay Championship’-ah semi-final an thleng.
He intihsiaknaah hian ram 42 zet an tel a, kumin event hi July 27- August 4 chhung khan neih a ni. India aiawh Mizo tlangval pahnihte hi an che ṭha hle a, kumin hi India chet ṭhat ber ṭum leh thlen san ber a ni.
He intihsiaknaa tel tur hian ram tinte hian mahni ram ṭheuhah intihsiakna an nei hmasaa, India aiawha kal tur thlanna hi nikum December thla khan YonKo Cosplay Fest 2018-ah preliminary round neih phawt a ni. Hemi hnu hian Dimapur-ah final round neih leh niin, hetah pawh hian Dominic leh Reuben-te hi pakhatna an ni leh thei a ni.
Tunah hian Japan ramah an la thang mek a, Thawhṭanni hian India lam panin an lo let leh ang. He Competition-ah hian Australia team-te chu pakhatna an ni.