Ayesha Malik-i'n Priyanka chhuahchhal

Los Angeles-a Beautycon panel talk-ah Priyanka Chopra chu Pakistan nula Ayesha Malik chuan 'ṭha der'-ah a puh.

Kar kal ta Inrinni khan global beauty standards talk hi neih a ni a, Q&A hunah Ayesha Malik hian kumin February 26-a Priyanka-i'n a Twitter-a 'Jai Hind" tih leh #IndianArmedForces tih a post behchhanin Priyanka hi a chhuahchhal a, ram inṭhenawm an nih avangin hetiang thu a post hian a rilru a tih nat thu a sawi a, 'ṭha der' tiin Priyanka chu a puh zui nghal a ni.      

"Remna leh muanna siamna kawnga hmalatu UNICEF amba­ssador i ni a, mahse nuclear-a indona chawkphur zawngin thil i ti a ni," tiin Malik hian a chhuahchhal.

India leh Pakistan nuclear ralthuam inbeihna kawngah hian chak zawk an awm lo a, Bollywood-a i sumdawnna hi, keimah anga thlawptu che tam tak Pakistan-ah hian i nei a ni, tia a sawi lai mekin Malik-i microphone chu an rawn laksak a ni.

Priyanka chuan, "Awle i duhtawk tawh em? kan ṭha tlang em?," tiin mawi hnai takin a chhang let thung. "Pakistan-ah hian ṭhian tam tak ka nei a, keipawh hi Indian ka ni. Indo hi ka thil duh a ni bik lo a, mahse ram leh hnam hmangaih mi ka ni. Min hmangaihtute rilru ka tina a nih chuan ngaihdam ka dil mawlh mawlh e," tiin a chhang let.

Malik chuan Pathianni khan a Twitter-ah Priyanka hi bei zui nghalin, UN ambassador dinhmun aṭang chuan a ngaih­tuah thui lo hle tih a sawi.