The Little Things bawkin sum a lalut tam leh ber
North America Box Office-ah The Little Things bawk sum lalut tam ber a ni leh a, pahnihna pawh kar hmasa lama pahnihna The Croods: A New Age tho ni lehin The Marksman chu pathumna a ni thung.
Denzel Washington leh Rami Malek-te channa The Little Things hian kar tawp liam taah khan theatre 2,206 aṭangin $2,100,000 a lalut a, North America box office aṭang ringawtin $7,800,000 a lalut tawh. Khawvel puma a sum lakluh zat chu $13,100,000 a ni tawh a ni.
The Little Things hi film critics lam chuan film hmuhnawm pangngai tak niin an ngai hlawm a, Rotten Tomatoes-ah mi 198-in an review aṭangin rating 5.5/10 a hmu a, CinemaScore chuan grade tlanglawn tak 'B-' a pe ve bawk.
Hripui leng vangin film thar lian thar, budget sang film hmuh tur a khat pharh a, chu chuan Box office a ti 'boring' a, thil thar hmuh tur a tam meuh lo.
Wonder Woman 1984 chu palinaah a la awm pha a, Monster Hunter pawh kar hmasa lama a dinhmun, panganaah a la awm ve bawk.
Film thar, film thar
Top 10-ah film tlangzarh thar lang pha a awm lo. Chutih rual chuan Box Office Mojo chart-ah film 33 tarlan a ni a, chung zingah chuan film thar paruk lai a awm.
Earwig and the Witch chu 12-na a ni a, The Reckoning chu 14-na ni bawkin Little Fish chu 18-na a ni. Dara of Jasenovac chu 20-na a ni a, Two of Us chu 24-na niin A Glitch in the Matrix chu 26-na a ni bawk.
Film sum lalut tam zual paruk chu theatre sang chuaha chhuah awmchhun an la ni a, The Marksman leh The Little Things chiah hi theatre sang hnih chuanga chhuah an ni. Film eng emaw zat chu theatre zaah pawh an chhuah lo.