Hlimhlimi'n V-Day pualin hla thar a tichhuak

'Ṭhian rinawm' hitmaker Hlimhlimi chuan Valentine's Day pualin hla thar a tichhuak dawn a, ngaihthlak theihin a awm thuai dawn a ni.

Hlimhlimi hla thar tur hi sap hla a ni dawn a, 'Fall in love again' tih niin ama phuah a ni nghe nghe. Contemporary Christian Music niin Muanpuia Renthleiin music a siam sak a, Recording chu Tpa (Kings and Prophets) kut chhuak a ni thung. Mixing and mastering pawh Kings and Prophets kut chhuak vek a ni a, video chu Akima Chhakchhuak siam a ni thung ang.

February 13 hian a YouTube channel-ah a dah chhuak dawn. Hlimhlimi zai ngainatute tan chuan hmaih chi a ni lo ang. Lunglei lamah shooting a va nei vang vang lehnghal a, beng mai bakah mit pawh a tlai hle turah beisei ila kan tisual lo ang.

"Pathian a hmasa berah tih hi Kristiante chuan kan dah lian ṭhin a. Kan eizawnna kawngah te, kan nitin nunah leh kan inlaichinnaahte pawh a niang, Pathian kan dah hmasa ṭhin. A bik takin ṭhalaite hian inngaihzawnna inkarah 'God first' tih hi a hma aia nasa zawkin kan dah len a ṭul hlein ka hria a. Thlarau thianghlim hruaina tel lo chuan hmangaihna tak tak a awm thei lo tih hi he hlain a sawi tum ber chu a ni," tiin a hla thar tur chungchang hi Hlimhlimi chuan Vanglaini a hrilh.

Hlimhlimi zai ngainatute tan thu lawmawm dang hriat tur a la awm. Kumin chhung ngei hian album siam a tum thu a sawi lang tlat mai. "Keima hla dawn hote siam kan han tum ve chu nia, mahse a hlawhtlinna erawh Pathian thu thu nise," tiin Vanglaini palai a hrilh a, a puitlin ngei theih beisei ila, kumin chu Hlimhlimi hla thar ngaihthlak tur kan nei nual turah beisei ang.