Miss Mizoram 2020 Khawzawl leh Siaha-in an district aiawh tur an puang

Khawzawl leh Siaha chuan nimin khan Miss Mizoram 2020-a an district aiawh tur an puang ve leh ta a, MJA leh Zonet ṭangkawpina an buatsaih Miss Mizoram 2020 thlanna kal mek zela district 9 aiawh turte chu district tina Organising Committee-te chuan an puang kim ta a ni.

Miss Mizoram 2020 Khawzawl District atan Zirsangpuii d/o VL Beiseia chu thlan a ni a, nimin khan  Khawzawl DC Conference Hall, Darngawn Vengah district aiawh tur puanna hun hi hman niin Khawzawl DC H Lianzela chuan district aiawh tur hi a puang a ni.

 

Zirsangpuii hi Khawzawl Veng­thar-a cheng a ni a, kum 23 mi niin ft 5'5"-a sang a ni. Aizawl College aṭangin BA Education a zir zo tawh a, zir chhunzawm leh tumin a inbuatsaih mek bawk. 

Miss Mizoram 2020 Siaha District atan kum 25 mi, Meisavaih-a cheng Jecelyn Lynanokhai chu an thlang. Jecelyn Lynanokhai hi Laty-ah zirtirtu nilai mek a ni a, Government Saiha College, Siaha aṭangin 2016 khan BA zoin, Miss Mizoram 2020-ah Siaha district ai a awh dawn ta a ni.

Nimin tlai dar 3-ah khan Siaha District aiawh tur thlanna hi neih a ni a, H. Zonunmawia, Election Officer, Siaha District chuan Sash leh Tiara a hlan.