Bangalore-ah Mizoram tan concert

Princess Virgo Events chuan Mizorama leimin vanga chhiat tawkte leh Assam tui lian tuarte ṭanpuina turin Bangalore khaw­puiah Charity Concert an buatsaih dawn a, The Leela Palace-ah concert hi neih a ni ang. 

Zanin dar 6:00-a neih tur concert hi Princess Virgo Events buatsaih ni mah se Bangalore Mizo Association, Mizo Students Association leh North East Solidarity pawl-ten an puibawm dawn a ni. Mizo mipuiin kan hriat lar zaithiam zingah Rebecca Saimawii pawh a che leh dawn a, ani bakah hian Blue Corn vanga hriat lo hlawh tawh Kim Kimi, Zoremi Tlau leh Mals Vanchh te mipui chawk hlim turin an inpho chhuak dawn. 

Bangalore khawpuia mipui hriat hlawh rapper Big Deal, DJ Panic, DJ Arah, DJ Andre leh DJ Sam te chu concert-ah hian an inlar dawn bawk. Princess Virgo Events neitu Vanlalremruatfeli Tlumang chuan, "Ka pa T. Hrevunga (L) kha midang ṭanpui tura min fuih ṭhintu, ani pawh midang ṭanpui nuam ti em em ṭhin a ni a, amah hriatreng nan midang ṭanpui turin kan pen chhuak dawn a ni," tiin Vanglaini a hrilh.