'tumblr.' man tlawm takin lei

Social networking site pakhat 'Tumblr' chu USD mtd 3 velin Automattic Inc-te chuan an lei tih The Verge chuan an tarlang.

Kum 2013 khan Yahoo-in 'Tumblr' hi USD vbc 1.1-in an lo lei tawh a, chu mi hnuah Verizon-te'n kum 2017 khan an lei chhawng ve leh a ni.

Automattic Inc. CEO Matt Mullenweg chuan, "Tumblr' chu WordPress anga mipuite mamawh phuhruk thei tur a ni dawn," tiin The Wall Street Journal hnenah a sawi.

Mizoram lamah chuan he social networking site pakhat 'Tumblr' hi kan hre lar vak lo awm e. Kum 2007 khan David Karp-a'n a hmu chhuak a, an headquarters chu New York-ah a awm a ni. 'Tumblr' hi Facebook leh Instagram-te ang deuh tho a ni a, kan duh zawng leh ngainat zawngte kan follow thei bawk. Thlalak, thuziak leh kan video duhte pawh a post thei a ni.