Mizo Idol star Jonathan Lalengzauva Zaninah a music video hmasa ber kan hmu dawn

Mizo Idol star Jonathan Lal­eng­zaua chuan a music video hmasa ber chu a peihfel ta a, zanin hian Zonet-ah tichhuah a ni ang. Pangzawl tlangval Jonathana hla thar hi 'Ka riang ngei e' tih a ni a, Mizo Idol-a a lo sak lar tawh kha a ni. 

Mizo Idol 2018-ah khan top 5-ah a tla a, hemi ṭum hian music video tihchhuah thuai a tum thu a sawi. A lo sawi lawk tawh ang ngeiin a music video hmasa ber chu a peihfel ta der mai a, a zai ngainatute tan chuan thu lawmawm tak a ni ngei ang. 

'Ka riang ngei e' tih hla hi Landry Vl Vena Khawlhring phuah niin, Jonathana aw nen pawh hian a inhmeh hle a ni. Music track hi Thangbawiha, EME Recording kutchhuak a ni a, video hi Hriatkima (Lianchhiari Picture) siam sak a ni bawk.  

Jonathana music video hi Music Domain Mizoram (MDM) library-ah dahluh niin, YouTube lamah pawh hmuh tur a awm thuai dawn a ni. 

Mizo Idol aṭanga a tlak khan Jonathana hian rimawi khawvelah a sang thei ang ber thlen a duh thu a lo sawi tawh a, a bulṭanna chauh a nih thu a sawi bawk.

A lo sawi lawk tawh ang ngei hian rimawi khawvelah hming a rawn chher chho a, zaia sawmtu pawh a ngah hle. Kum 10 mi lek a nih aṭanga mipui hma-a lo zai ṭan daih tawh a ni a, rimawi a ngaina hle tih a hriat. Tuna a music video hi a bulṭanna chauh a la ni a, hla dang pawh tichhuah zel a tum. 'Leikapui Style' larpui thei khawpa talent nei ṭha niin, 'Phengphe khua a tlai zo ta' tih leh CFL Hmingthanga hla 'Lehkha thawn' tih hla a sakte chu bengah a la cham a ni. 

Jonathana hian a tum ram thleng turin theihtawp a chhuah zel dawn a, rimawi lamah a theih ang tawka insawrbing a tum tlat a ni.