Thla khi kum tld 4.51 liam taah a insiam!!!

Mi thiamte chuan zirchianna an neih thar aṭangin Thla (moon)  khi solar system insiam aṭanga kum maktaduai 50 hnuah a insiam nia rinna thar an nei a, hei hi a dik a nih chuan an rinna hmasa aiin a upa zawk tihna a ni.

Zirna hmasaah kha chuan solar system insiam hnu kum maktaduai 150-a insiam nia rin a ni ṭhin a, mahse tunah chuan an rinna hmasa aiin a upa zawk a nih hmel. Germany-a University of Cologne scientist-ten an zirchiannaah chuan solar system hi kum tld 4.56 kal taa insiam kha a ni a, Thla erawh khi chu kum tld 4.51 kal taa insiam niin an ngai. He an zirchianna hi Nature Geoscience journal-ah tihchhuah a ni a, scientist-te hian Apollo mission hrang hranga sample an lakkhawmte aṭangin zir chianna hi an nei a ni.

July 21, 1969 khan mihring chuan a ṭum­khatna atan Thlaah ke an nghat a, hemi ṭum hian Thla sample kg 21.55 chu khawvelah an rawn keng let a, hemi hnua Apollo mission neih leh aṭanga an sample neihte nen uluk taka an zirchian hnuah Thla upat zawng thar hi an tichhuak ta a ni. (Scientist-te pawh hian an zirchianna aṭanga an thil hmuhchhuah ṭhin pawh hi an thlak ve fo reng tih erawh hriat tel ve a ṭha)