Halsey-i'n meizial zuk a bansan

American singer/songwriter Ashley Nicolette Frangipane, Halsey tia hriat lar chuan Ningani khan kum 10 chuang zet hnuah meizial zuk a bansan thu a sawi.

'Nightmare' hitmaker chuan meizial zuk a chaknain a ṭhinlêtna (withdrawal symptoms) vanga a mood fuh loh avangin a ṭhian ṭhenkhatte chu kumkhuaa a chân a rin hial thu a sawi. Mahse tunah chuan ka ṭha tawh hle a ni, a ti.

Kum 24 mi Halsey chuan a twitter-ah, "Kum 10 chuang zet meizial ka zuk hnuah nicotine chu kar eng emaw zat ka bansan ta. Ka rih belh a, ka awm dan avangin ka ṭhian ṭhenkhat erawh ka chan hlen maithei, mahse tunah chuan ka hlim hle a, nuam ka ti hle a ni," tiin a ziak.

Halsey chuan a bialpa  Dominic Harrison chuan a nundan a thlaksak tih a lo sawi tawh bawk a nih kha, anni hi nikum November thla vel aṭang khan an inzui tawh a ni. Kan ngaihsana kan entawnte pawhin meizial zuk hi ṭha lo an ti tih a hriat a, an nundan ṭha lo lai tam tak kan entawn a, a ṭha lai entawn ve pawh hi a pawimawh hle a ni.