Oscar Award Nominee 'Roma' leh 'The Favourite' langsar Lady Gaga leh Cooper an bang bik lo

Film khawvela award ngaih­hlut ber Oscar Award chu thla thar mai hian sem a ni leh tawh dawn a, award dawng thei tura chhawpchhuah te hming pawh puan a ni leh ta. 'Roma' leh 'The Favourite' te chu category 10 zetah langin, chawimawina dawng tura khan ber an ni.  

Hetih lai hian 'A Star Is Born' star Bradley Cooper leh Lady Gaga te chu Best actor leh actress la thei dinhmunah an ding ve ve a, mimala ngaihven hlawh an ni. Black Panther chu superhero film zinga Best Picture category-a langthei hmasa ber niin, record a siam bawk. 

Nikuma film chhuak zingah khan a langsar ber chu an ni hauh lo - mahse belhchian erawh an dawl hle. Film lama chawi­mawina ngaihlut ber sem a nih dawn meuh chuan Roma leh The Favourite te aia langsar an awm chuang lo a, an lamah mipui mit a fu ṭhup a ni ber. 

Category 10 zeta lan ringawt pawh hi thil namai lo tak a ni a, hlawhtlinna pakhat chu a ni der tawh. Chutih rual chuan award sem a nih hunah an ropui zo ang em tih chu fiahin a awm dawn a ni. 

Mexican actress Yalitza Apari­cio leh Marina De Tavira te channa 'Roma' hi nikum October thla khan tlangzarh a ni a, a hit rem rem hle. Yalitza leh Marina te hi Roma film-a an inlan hma kha chuan hriat an hlawh lem lo a, tunah erawh Best Actress leh Best Supporting Actress dawng thei tur zingah an hming a chuang vang tawh a ni. 

Comedy-drama film 'The Favourite' hi nikum December thla khan tlangzarh a ni ve thung a, a changtute pawh Hollywood-a mi challang tak tak te an ni hlawm. English actress Olivia Colman leh American actress Emma Stone te bakah, British star Joe Alwyn leh Rachel Weisz te channa a nih miau avangin category 10 zeta a lang hi thil mak a ni lo. 

Roma leh The Favourite te hi tunlai film lar leh en hlawh ber ber an nih avangin, award an dawng nual a nih pawhin a mak lo ang. Chutih rual chuan category khata an lan dunna a awm nual avangin - inkhing ber tura ngaih an ni.  

Award ngaihlut ber te zinga mi Best Picture chu category ngaihnawm ber tur zinga mi a ni leh dawn. Tun lai film lar ber ber - BlacKkKlansman, Black Panther, Bohemian Rhapsody, The Favourite, Green Book leh Roma te an awm a, a ngaihnawm dawn. Heng bakah hian A Star Is Born leh Vice te an la awm cheu avangin award dawng tur ber pawh rin thiam a harsa hle. 

Black Panther chu he cate­gory-a superhero film awm chhun a ni a, record a siam tawh hi hlawhtlinnain a zui thei ang ngem tih chu hriat chakawm tawh tak a ni. 

Christian Bale, Bradley Cooper, Willem Dafoe, Rami Malek leh Viggo Mortensen te zingah, tunge ṭha ber tih chu February 24-ah puan a ni dawn. He category-a langte hi Hollywood-ah pawh huhang ngah ber ber an ni hlawm a, chawimawina dawn phu hliah hliah vek an ni. 

'Vice' star Christian Bale hi kum 44 mi lai ni tawh mah se lemchan khawvelah chuan a ṭha ber te zinga mi a la ni. American actor Bradley Cooper hian 'A Star Is Born' avangin chawimawina a lo dawng tawh a, Oscar Award pawh hi a dawng leh lo ang tih sawi theih a ni lo. 'Bohemian Rhapsody' star Rami Malek leh Viggo Mortensen (Green Book) te an khan viau bawk. 

Award ngaihhlut per pakhat a ni a, a dawng thei tura chawp­chhuah te pawh an hrawl hlawm hle. He category-ah hian - Yalitza Aparicio, Glenn Close, Olivia Colman, Melissa McCarthy leh Lady Gaga te an katnuk a, chawimawina dawng tur ber pawh rinthiam harsa tak a ni. 

'A Star Is Born' star lady Gaga chu mipui ngaihven ber a ni a, ani hi lemchan khawvelah chuan mithar a la ni. American singer hian nikum khan film a chang 

ṭan ve chauh a, A Star Is Born hi a inlanna hmasa ber a ni. Heti chung hian award hrang hrangah a hming a lang a - Golden Globes Award hial hlan a lo ni tawh bawk. 

Tun ṭum Oscar-ah pawh hian category pahnih - Best Actress leh Best Song-ah te award dawng thei tur zingah a tel a ni. 

Best Director category huanga lang te pawh hi an theu­neu lo hle a, Mexican film director lar Alfonso Cuaron leh BlacK­kKlansman film siamtu Spike Lee te an ni nawk. 

Anni bakah hian 'The Favourite' film director Yorgos Lanthimos leh American film director Adam McKay (Vice) te an la awm cheu bawk a, Cold War film siamtu Polish filmmaker lar Pawel Pawlikowski a la awm cheu bawk. He category hi mipui ngaihven leh hriat chak ber te zinga mi a ni ngei ang. 

Category hrang hrang 24 zet awmna Oscar Award hi February 24 khian a vawi 91 nan Dolby Theatre, Los Angeles-ah sem a ni ang. Academy of Motion Picture Arts and Sciences chuan nominee hi kan ram sana-a nimin zing khan a puang a, lemchan khawvela chawmiawna ngaihlut ber hian ngaihven a hlawh hle a ni. 

BEST PICTURE

    Black Panther

    BlacKkKlansman

    Bohemian Rhapsody

    The Favourite

    Green Book

    Roma

    A Star Is Born

    Vice

BEST ACTOR 

    Christian Bale - Vice

    Bradley Cooper - A Star Is Born

    Willem Dafoe - At Eternity's Gate

    Rami Malek - Bohemian Rhapsody

    Viggo Mortensen - Green Book

BEST ACTRESS 

    Yalitza Aparicio - Roma"

    Glenn Close - The Wife"

    Lady Gaga - A Star Is Born"

    Olivia Colman - The Favourite"

    Melissa McCarthy - Can You Ever Forgive Me?"

BEST DIRECTOR

    Spike Lee - BlacKkKlansman"

    Pawel Pawlikowski - Cold War"

    Yorgos Lanthimos - The Favourite"

    Alfonso Cuarón - Roma"

    Adam McKay - Vice"

FOREIGN LANGUAGE FILM

    Capernaum

    Cold War

    Never Look Away

    Roma

    Shoplifters

ANIMATED FEATURE FILM

    Incredibles 2

    Isle of Dogs

    Mirai

    Ralph Breaks the Internet

    Spider-Man: Into the Spider-Verse