K-Pop group zinga viewer ngah ber BLACKPINK

South Korean girl group lar BLACKPINK chu K-Pop group zinga YouTube-a viewer ngah ber an ni a, an music video 'Ddu-Du Ddu-Du' chu mi maktaduai 600 chuang zetin an en tawh a ni. Hetih lai hian Psy 'Gangnam Style' chu viewer ngah ber a la ni reng a, mi tluklehdingawn 3.2 zet viewer a nei a ni. 

Member pali awmna BLACKPINK hi kum 2016-a indin chauh an ni a, an lar chak vet vet hle. Tunah chuan K-Pop group zinga thawm nei lian ber te zinga mi niin, YouTube viewer neih tam lamah phei chuan No.1 an hauh der tawh.

An hla hit 'Ddu-Du Ddu-Du' hi nikum June thla khan an tichhuak a, kum khat pawh a vei hmain mi maktaduai 621.8 zetin an en a ni. K-Pop group zinga viewer ngah ber record hi January 21, Thawhṭanni khan an siam a, ni khatah viewer mtd 2.4 vel nei ziah ang an ni. Hetih lai hian BTS chuan 'DNA' hmangin pahnihna an hauh a, viewer maktaduai 618.9 an nei. 

South Korean singer Psy erawh a la ropui ber thung a, a record thai chhe tur chuan beih fe a ngaih hmel. Psy hian 2015 khan rimawi  khawvel nghawr­nghing dawt thei khawpa hla hit 'Gangnam Style' a ti chhuak a, tun thlengin YouTube-a en hlawh ber te zinga mi a la ni. 

BLACKPINK te hi a vawi khat nan Coachella Festival-ah an inlan dawn a, North American lam­ah tour nei turin an in­buatsaih mek bawk.