Olivia Rodrigo 'Drivers License' a la hit zel

Billboard Global 200 chart leh Billboard Global Excl. U.S. chart-ah Olivia Rodrigo debut single 'Drivers License' bawkin ro a la rel. Kar li chhung heng chart pahnihah hian topper a ni tawh!

American tleirawl duhawm hi rimawi khawvelin a atchilh laklawh tawh a, tunah chuan Billboard Global chart pahniha a ruala, a zawn zata kar li chhung topper ni thei hmasa ber a ni tawh bawk. 

January 29 leh February 4 inkar khan Drivers License hi vawi maktaduai 89.9 stream a ni a, unit 21,000 hralh a ni bawk a, Disney+ High School Musical: The Musical: The Series star hi Global 200 chart-a topper ni rei thei ber zingah a tel tawh. He chart bikah hi chuan rimawi khawvelah la naupang hle mah se Mariah Carey leh BTS-te nen huang khatah dah theih a ni tawh. Mariah Carey 'All I Want for Christmas Is You' leh BTS' 'Dynamite'-te nen Global 200 chart-a No.1 nih rei zawngah tlar khatah an ding.

Billboard Global Excl US chart, US pawn lamah chuan January 29 aṭanga February 4 inkar khan vawi maktaduai 58.8 stream a ni a, unit 8,000 hralh a ni bawk. Billboard Hot 100 chart-ah pawh kar li chhung No.1 a ni tawh a ni. A la lar telh telh dawn niin a lang.

Engatinge zaithiam lar tak tak an tam tawh a, kar li chhung topper ni thei an va la tam lo kan ti a ni mai thei. Billboard hian nikum September thla khan Global chart pahnih hi a siam ṭan chauh a ni.

'Drivers License' hi UK lamah pawh a tla na hle a, kar li chhung Official U.K. Singles Chart-ah pakhatna a ni tawh a ni.

January 12 khan UK-ah hian vawi mtd 2.407 lai he hla hi stream a ni a, ni khatah Krismas hla ni lo stream tam ber record a siam hial! Ed Sheeran-a'n 'Shape of You' hmanga record a lo siam tawh chu a khum.

Ram eng emaw zat single chart-ah No.1 a ni a, chung zingah chuan Australia, Austria, Belgium, Canada, Czech Republic, Denmark leh Finland-te pawh a tel. 

Billboard 200 album chart-ah chuan Morgan Wallen 'Dangerous: The Double Album' bawkin ro a la rel a, kar li chhung chart topper a ni tawh.

Kar hmasa lama pangana 2 Lil Durk 'The Voice' chu pahnihnaah a rawn invawrh thung a, Pop Smoke 'Shoot For The Stars Aim For The Moon' chu pathumna a ni ve bawk.

Morgan Wallen hi  Billboard Artist 100 chart-ah kar li chhung lai No.1 a ni ve tawh bawk a, country music artist zinga he dinhmuna ding thei rei ber record a siam chiah a ni. Jason Aldean record lo siam tawh a khum.