Jared Leto 'Joker' hmel a uang lo

Zack Snyder's Justice League tlangzarh hun a hnai zel a, director Zack Snyder pawh a phur tawh hle. Tunhnaiah a twitter account-ah helam kaihhnawih hi a post nasain video clip tawi leh thlalak hrang hrang a tarlang nasa. Thawhlehni khan Vanity Fair-in Jared Leto 'Joker' chiang taka a landan tur a tarlan chu a re-tweet a, mit a la zar mai.

Vanity Fair chuan Justice League SnyderCut Joker thlalak hi pahnih a tarlang a, Joker nuih a za lo tih a hriat a, ṭhenkhat tan phei chuan a thlalak hi a rapawm letling viau mai thei. An thlalak pholan hi rawng nei lo a ni a, Leto sam a sei a, kawrfual var hian Suicide Squad lama a inlan loh ang takin a tatoo lam 'focus' a ni lo.

Warner Bros lamin a tira ruahmanna an siamah chuan Avengers ang deuh khan Zack Snyder hmalakna hnuaiah DCEU khawvel zau tak siam an tum a, Ben Affeck 'Batman' leh Leto 'Joker' te pawh la insualtir ngei an tum niin a lang. Mahse Justice League an chan laklawh laiin Snyder chu a fanu a thi ta hloh mai a, project lian tak a chhuahsan phah a, DCEU hmalam hun chu a phe ta ruai mai a ni.

Mahse fan-te'n an lo beiseina kha a thamral an phal lo a, social media lama nasa taka campaign an kalpui avangin thlaleh tawp lamah hi chuan Zack Snyder's Justice League hi kan en thei tawh dawn a nih hmel a, chutah chuan kum 2017-a Justice League tlangzarh a nih dawn leh a nih hnu pawha sawilana la awm ngai lo, Jared Leto 'Joker' hi kan hmu dawn. Role pangngaiah a inlan dawn nge 'cameo' angin kan hmuh dawn a la hriat loh a, film-te han tlangzarh phawt se, kan la hria ang chu.

Justice League SnyderCut hi HBO Max-ah tlangzarh a ni dawn a, a tirah kha chuan mini-series angin tihchhuah a ni dawn tih sawi mah se tunah chuan movie pangngai a ni dawn niin an sawi leh tawh a ni.