Carrie Underwood record tluktu Lauren Daigle

Kristian singer lar Lauren Daigle chuan Hot Christian Songs chart-ah Carrie Under­wood record a rawn nih rual a, a zawnin kar 26 chhung zet No.1 a hauh tawh a ni. 

Lauren Daigle hian a hla hit 'You Say' hmangin American singer ve tho Carrie Underwood record hi a rawn nih rual a, record thar siam thei dinhmunah a ding mek bawk. 

Kum 2019 a herchhuah hma zawng kha chuan Hot Christian Songs chart-ah roreltu pakhat a awm a, a hming chu Carrie Underwood a ni. Tun hnaia fapa thar nei Underwood hian kum 2014 khan a hla thulkhung 'Something in the Water' hmangin kar 26 chhung zet chu chart-ah No.1 a lo hauh tawh a, hun eng emaw chen chu record a ni. 

Tun hma lamin hetiang chen chen No.1 hauh thei hi an la awm ngai lo a, hahipa an sawi a tling reng a ni. Kum 27 mi Lauren Daigle lo lan hnuah erawh thil a danglam ta a, American chhuanvawr Carrie Underwood record hi thaichhe thei dinhmunah a rawn ding ta hial a ni. 

American singer Lauren Daigle hi tunlai gospel singer zingah chuan hriat hlawh berte zinga mi a ni a, country singer lar Carrie Underwood record hial a rawn nih rual takah chuan a chanchin hian ngaihven a hlawh zual hle a ni. 

'Light Of The World' singer Lauren hian nikum July thla khan hla lungkuai tak mai 'You Say' a tichhuak a, beisei phak bakin a che ṭha. He hla hmang hian Hot Christian Songs chart-ah roreltu a rawn ni nghal chat a, thla ruk a liam meuh chuan record thar duhawm tak siam thei dinhmunah a rawn inhlangkai ta a ni. 

A hla thulkhung 'You Say' hi nikum July 13 khan YouTube-ah upload niin, mi maktaduai 59 chuang zetin an view tawh a ni. YouTube-ah bik hian Carrie Underwood 'Something in the Water' chu viewer neih tam lamah a rawn khum bawk a - Underwood hian viewer mtd 28 a nei a ni. 

Lauren hian Billboard strea­ming leh airplay-ahte No.1 a hauh mek a, Christian Digital Song chart-ah kar 23 chhung zet din­hmun sang ber a luah tawh bawk. Heng bakah hian Christian Airplay chart-ah kar 17 chhung zet chu pakhatna a lo luah tawh bawk a ni.