Oscar dawn ve chak Beyonce

American singer Lady Gaga chu film lama chawi­mawina ngaihlut ber dawng thei tura chawpchhuah zingah a tel a, Best Actress ni thei mai dinhmunah a ding mek. Hetiang vel boruak a awm mek lai hian American pop star Beyonce hming pawh a rawn lang nawlh a, Oscar dawn chak avanga tuihal zingah a lo tel ve reng mai. 

Lemchan khawvela lo zuang­lut ve zauh tawh Ame­ri­can singer Beyoncé hian film lama chawimawina sang Oscar dawn chu a lo suangtuah ve ṭhin a, a tak ram erawh a chang zo ta lo. 'Austin Powers in Goldmember' film-a a thawhpui English actor Sir Michael Caine chuan Beyoncé hian Oscar dawn hi a chak em em leh a dream a nih thu tunhnai khan a sawichhuak mauh mai. 

'Single Ladies' singer hi kum 2002-a tichhuah action/comedy film 'Austin Powers in Goldmember' film-ah khan a changtu zingah a tel a, nuam pawh a ti hman viau. Film khawvela chawimawina sang dawn vete pawh chu a lo suang­tuah ṭhin a, mahse a thamral ta a ni. Sir Michael Caine chuan Beyoncé hian Oscar a lo dawn tawh chung­changte a sawipui ṭhin thu leh, dawn ve a chak thute chu a lo hrilh fo tawh ṭhin niin a sawi. 

Kum 37 mi Beyonce hi film khawvelah a mikhual vak lo a, Austin Powers in Goldmember bakah hian The Pink Panther leh Dreamgirls-ahte a lo inlan ve tawh a ni.