Retail company hlu ber Walmart Top 100-ah Reliance Retail

Deloitte-in Global Power of Retailing 2019 Index a tichhuah thar berah American company Walmart chuan dinhmun sang ber a luah a, hetiah lai hian Reliance Retail chu India company zinga lang awm chhun a ni.

Sumdawng hausa Mukesh Ambani company Reliance Retail hian pen khata hmasawnin 95-na aṭangin 94-ah a chho. 

American multinational retail company hi kum 1962 daih tawha din niin, khawvela retail company hlu ber dinhmun vawi eng emaw zat lo chelh tawh a ni. Deloitte report thar berah pawh No.1 a hauh leh a, a hlutna hi kum khat chhungin 3% in a pung. Khawvel huapa company hlu thlanchhuah zingah pawh top 5-ah a lang phak a, retail bikah chuan a sang ber thung. 

Walmart hi khawvel ram hrang 27 zetah an inzarpharh tawh a, hmun hrang hrangah dawr 11,277 zet an nei tawh bawk. An hnuaiah hian Indian retailer, Flipkart pawh awmin,  Japanese retailer Rakuten pawh an enkawlna hnuia awm vek an ni. 

Walmart hian truck driver 100 tel an lakbeh dawn a, an hlawh pawh a pung nasa dawn hle. An driver-te hlawh hi an tihpun hunah chuan chawhrualin $90,000 vel zet a ni ang. 

Walmart hi American retail company lar Costco leh Kroger-te chuan an dawt a, American company-ten ro an rel hneh hle. 

Amazon chu palina-ah awmin, kum khat chhunga a hlutna punna chu 25.3% zet a ni. 

Reliance Retail hi Indian company zinga top 250-a lang thei awmchhun a nih miau avangin dahhniam chi rual a ni lo. Tunah hian khawpui hrang hrang 6,400-ah inzarpharhin, dawr 9,907 zet an enkawl mek a ni.

India rama retail company lian ber hian kum khat chhungin India pawisa vbch 93,903 zet an la lut a, chuta ṭanga hlawkna an hmuh chu vbch 4,278 zet a ni. Khawvela company ṭhang chhak zual zingah pawh a lang phak hial a, top 50-ah a inhlangkai hial. Hei hian rahṭha chhuahin tunah chuan khawvela retail company hlu ber berte zinga a lang ta bawk. 

Deloitte hian khawvela retail company lian zua te chu zirchiang­in an dinhmun a tarlang ṭhin a, kum khat danah report a tichhuak ṭhin. Company-te hlutna hi an revenue aṭanga chhut niin, kuminah pawh nasa takin a pung a ni. 

Company 250-te revenue hi US dollar tluklehdingawn 4.53 zet a tling a, kum nga chhunga an hlutna punna chu 3.3% a ni. Top 10-a langte hlutna belhkhawm chu 31.6% zet niin, a tam ber hi European company-te an ni.