Markle channa 'Suits' serial titawp dawn

Duchess of Sussex Meghan Markle channa Ameri­­can drama serial 'Suits' chu entu an tlakhniam nasat avangin tihtawp a ni dawn. Suits hi season 9 kalpui mek a ni a, hemi zawh hnu hi chuan titawp a ni zui tawh dawn niin an tarlang a ni. 

Suits hi America-ah chuan drama serial en hlawh berte zinga mi niin, entu pawh an ṭhahnem ṭhin hle. Mahse a changtu ṭhenkhat ten an chhuahsan avangin entu an tlahniam zel e, hei vang hian tihtawp a ni dawn ta a ni. 

American actress Mar­kle hi Suits-ah hian kum 2011 aṭang khan a inlan a, nikum thleng khan a la inlan. Tunah chuan British lal tupa Prince Harry nupui a nih tawh miau avangin duh lam lam hawi thei a ni tawh lo a, Suits pawh hi a chhuahsan a ṭul ta a ni. Markle bakah hian Patrick J Adams chuan he serial hi a lo chhuahsan tawh bawk a, hei pawh hian ngawng a nei lian hle. 

Meghan leh Patrick-te an awm loh hnu hian viewer hi nuai telin an tla hniam a, a siamtute lu pawh a hai hle niin an sawi. American television producer Aaron Korsh chuan season 9 kal mek a, episode 10 a zawh hnuah chuan tihtawp ve nghal a tum thu hi Nilaini khan a puang a ni. 

American legal drama serial lar 'Suits' hian season 8 khan chawhrualin viewer maktaduai 1.2  a nei a, mahse season hmasa lam a phak lo hle a ni. Season hmasa berah khan chawhrualin mi mtd 4.6 velin en ang an ni a, a lar vanglai a pel tawh a ni.