Ariana Grande '7 Rings' a hit

Ariana Grande hla thar '7 Rings' chu a hit rem rem hle a, Billboard Hot 100-ah No.1 hauh thei turin a dinhmun a ṭha hle. 

Zaithiamte hlawhtlinna tehna pawi­mawh tak pakhat chu Billboard chart a ni a, chart-a che ṭhate hi a lar pawh an lar viau zel a ni. American singer Arina Grande pawh ṭum dang ang bawkin Billboard chart hrang hrangah a inlar leh dawn a, Billboard Hot 100-ah bik phei chuan a dinhmun a ṭha hle. 

Ariana hian January 18 khan '7 Rings'  hi a tichhuak a, tlangzarh aṭanga kar khat hnu lekah Billboard chart-ah kan hmu nghal dawn a ni. YouTube lamah pawh en a hlawh rem rem hle a, mi maktaduai 72 chuang zetin an view leh der tawh! US-ah pawh hla hralh kal ber a ni mek a, man chawiin an download nasa hle. 

Kum 25 mi Ariana Grande hian album a buaipui mek a, hemi rual hian single pawh a tichhuak ve reng a ni. Nikum November thla khan 'Thank U, Next' a tichhuak a, hei hi a album title tur a ni nghe nghe. A studio album pangana tur 'Thank U, Next'  hi February thla tir hian tlangzarh a ni ang.