Zaninah Zualbawihi hla thar 'KAN HMANGAIH CHE A SIN'

Mizo Idol aṭanga Zoram mipuiin kan hmelhriat R. Lal­hmangaihzuali (Zualbawihi) chuan zanin hian a hla thar 'Kan hmangaih che a sin' tih chu YouTube kaltlangin a tlangzarh dawn. Tun ṭuma a hla thar hi Zoram hmangaih hla niin, a YMA deuh ruih dawn a ni. 

A hmasa ber atan  Chaltlang nula Zualbawihi hian nikum khan lengzem/lenglawng music video a tichhuak a, kuminah erawh hla thar nen kum bul a rawn ṭan thung.  Kumina a music video hmasa ber tur hi Lenglawng huanga mi niin, ngaihthlak man hla tur tak a ni.

'Kan hmangaih che a sin' tih hla hi Lalchhanhima Khiangte, Ku­likawn phuah niin, music track pawh hi a ama kutchhuak a ni. Recording hi Valtea 

(Fos­­ter Recording) siam sak niin, video hi Zo-a kutchhuak a ni thung.

Zualbawihi chuan, "A hla hi a mawiin a thu a ṭha em em a, ka sak awm tak pawh niin ka hria. Zoram hmangaihna hla a nihna hi a hlutna tak pakhat a 

ni a,  mitin huap zo hla ṭha tak a ni," tiin a hla chungchang a sawi. A music video-ah hian a ṭhian­ten an pui dawn bawk a, a bridge aṭangin an lo zaipui dawn a ni. 

Tun lai khawvelah internet tel lo chuan thil a famkim tak tak thei tawh lo a ni ber a, zaithiamte pawhin an hla tihlar nan ber an hmang tawh. Zaithiam  dangte ang bawkin Zualbawihi pawh hian a music video thar hi YouTube lamah a tichhuak hmasa dawn a, zan lamah lo ngaihchan mai tur a ni. Zualbawihi music video hi local channel lamah hmuh tur a awm dawn leh dawn loh a la hriat mai theih rih loh a ni.

Nikum khan folk song album tihchhuah tumin a bei a, a peihfel hman lo. Kuminah erawh tihchhuah hman ngei a tum tawh a, a hun tur tak erawh a la  sawi lawk thei lo. Zualbawihi chuan, "Nikum khan album peihfel hman turah ka inngai a, amaherawhchu inthlan kumte a nih avangin programme a tam a, duh angin hma ka la chak thei lo a ni. Kuminah erawh folk song album ṭha tak mai chhawpchhuah ngei ka tum tawh a, hma pawh ka la leh mek a ni," tiin, album tihchhuah chu a hmachhawp lian ber a nih thu a sawi.

'D sakhmel ṭha' tih hla thiam tak maia satu Zualbawihi hian rimawi khawvelah a theih anga tam inhnimphum a tum a, awm mai mai a tum hauh lo. Hla phuah lama Mizote chhuanvawr John Mawitea leh Mapui Fanai-te hla a buaipui mek a, track pawh siam zawh a ni tawh. Hei pawh hi a chhuak har vakin a rinawm loh a - 'Kan hmangaih che a sin' a tihchhuah hnu hi chuan a buaipui zui leh nghal mai a rinawm. 

Zualbawihi hian November 2017 khan hla pahnih - 'Bei­seiseina beidawn thlak' tih leh 'D sakhmel ṭha'-te a tichhuak a, 'Kan hmangaih che a sin' tih hla hmangin Zoram mipui min awi ve leh thung dawn a ni.