Hontrade International Ṭhazual Fakna: Dinhmun sang berah Dawngkimi

Mizo Idol aṭanga Zoram mipuiin kan hmelhriat Malsawmdawngkimi chuan Hontrade International Ṭhazual Fakna chart-ah No.1 a hauh a, dinhmun sang ber a luah ṭum khatna a ni. 

Dawngkimi hian nikum November thla khan a music video hmasa ber 'A hnen pan la' chu a tichhuak a, he hla hmang hian pakhatna hi a luah a ni. 

Kolasib nula hian Mizo Idol Season 6-ah khan mipui ṭan a hlawh hle a, a tum ram thleng phak loa a tlak chhan pawh vanduai vang a tih theih awm e. A zai thiam zia mipuiin an hai lo a - a music video hmasa ber pawhin Ṭhazual fakna chart-ah dinhmun sang ber a luah vang a ni. 

 'A hnen pan la' tih hla hi Malsawm­tluanga phuah niin, music track leh recording hi rimawi lama sulhnu nei ṭha tak Blue Wave kutchhuak a ni. Video hi Liantluang Pictures siam sak a ni ve thung a, tunlai fakna hla thlan hlawh ber a ni pawh hi a awm viau a ni. 

Tun ṭum chart-ah hian Stacy V.L. Muanpuii chuan pahnihna a luah a, Sawmtea chu pathumna a ni. Stacy hian nikum khan Ṭhazual Award a dawng a, Best Female Artist (Gospel) atan thlan a ni. Tun ṭumah pawh hian a hla hit 'Thlen ka nghakhlel' hmangin pahnihna a rawn hauh a, mipuiin a zai an ngaithla nasa hle tih a lang. 

Rualthansanga Khiangte chuan 'Hal loin' tih hla hmangin palina-ah a inhlangkai a, Peter Lalnunpuia leh Henry Varte-ten an dawt. Mizo Idol star Peter-a hian 'Tlang lamah khian' tih hla hmangin a dinhmun a siam ṭha mek zel a, Henry Varte pawhin 'A sawm che' tih hla a hlawhtlinpui mek. 

Film lamah pawh kan hmuh ṭhin Sangtei Renza chuan zai lamah pawh a duai lo tih tarlang nawn lehin - pasarihna a luah. Sangtei Renza hian nikum khan music video 'Malsawmna' a tichhuak a, he hla hmang hian Ṭhazual chart-ah hun eng emaw chen chu a lang tawh a ni. 

'Krista Thisen' tih hla thiam tak maia satu Lalremruata Fanai chu pariatna-ah awmin, Grace Lalchhanhimi leh Jennie Lalruatfeli-te chu hnukhartuah an ṭang thung. Grace-i leh Jennie-te hi vawi eng emaw zat No.1 lo hauh tawh an ni a, Ṭhazual chart-ah an mikhual lo hle. 

1. Malsawmdawngkimi - A hnen pan la

2. Stacy V.L. Muanpuii - Thlen ka nghakhlel

3. Sawmtea - Ka awin Pathian chu ka auva

4. Rualthansanga Khiangte  - Hal loin

5. Peter Lalnunpuia - Tlang lamah khian

6. Henry Varte - A sawm che 

7. Sangtei Renza - Malsawmna 

8. Lalremruata Fanai - Krista Thisen 

9. Grace Lalchhanhimi - Rinna mitin ka thlir thin

10. Jennie Lalruatfeli - Thuneihna I ta