SAG Award Black Panther-in award pahnih la

Kum tina sem ṭhin Screen Actors Guild Award (SAG) chu nimin zing khan sem a ni leh ta a, fantasy/science fiction film lar 'Black Panther' chuan award ngaihlut tak pahnih a la. 

Hetih lai hian 'Bohemian Rhapsody' star Rami Malek chu Best Actor atan thlan niin, Best Actress award chu 'The Wife star' Glenn Close kutah hlan a ni. 

American actor Chadwick Boseman channa Black Panther hi nikum January thla khan tlangzarh a ni a, a hlawhtling rem rem hle. A hlawhtlinna hi sum leh paiah a tawp mai lo a, chawimawina hrang hrangin a zui a ni. 

Tun hnai award sem hrang hrangah Black Panther hian hmun lailum a chang pha zel a, SAG Award-ah pawh award ngaihut tak pahnih - Outstanding Cast leh Outstanding Stunt Ensemble-te a la a ni. Award ceremony-ah hian Black Panther star-te pawh an inlan kim ṭha hle a, mipui lawm pawh an hlawh hle a ni. 

Eng award pawh nise Best Actor leh Actress-te hian ngaihhlut an hlawh ṭhin a, he chawimawina dawngtute pawh hi a ṭha ber ber an ni ṭhin. SAG Award-ah hian Black Panther a lang­-sar ber a, mimal chawimawina erawh a la pha bik lo. 

Kum 37 mi Rami Malek chuan Best Actor award a la a, ani hi Bohemian Rhapsody film hlawhtlinna pakhat a ni. A hna thawh rah hi sengin actor ṭha ber atan thlan a ni a, a phu hle. American actress Glenn Close chuan kum 71 mi zet tling tawh mah se film khawvelah chuan a 'tar' lo tih a lantir a, Best Actress award a humhaw a ni. 

Best Supporting Actor chu Green Book star Mahershala Ali kutah hlan niin, hmeichhe lamah English-American actress Emily Blunt chuan he chawimawina hi a la ve bawk. 

TV serial lama langsar ber chu 'The Marvelous Mrs. Maisel' a ni a, award pawh a la nual. American actress Rachel Brosnahan chuan The Marvelous Mrs. Maisel hlawhtlinna hi chhawr ṭangkaiin Best Actress, Comedy Series award hlan a ni a, a chanpui Tony Shalhoub chu Best Actor, Comedy Series award hlan a ni bawk. Award ceremony-a lawm hlawh tak pakhat chu kum 28 mi Rachel Brosnahan hi a ni a, chawimawina hlan a nih lai pawhin mipui thawm a ring ṭha hle. 

The Marvelous Mrs. Maisel bakah hian - Ozark, Killing Eve, The Assassination of Gianni Versace, Escape at Dannemora leh Glow-te chuan award an la ve bawk.

Outstanding Cast :  Black Panther

Best actor : Rami Malek (Bohemian Rhapsody)

Best actress: Glenn Close (The Wife)

Best supporting actor: Mahershala Ali (Green Book)

Best supporting actress: Emily Blunt (A Quiet Place)

Outstanding Stunt Ensemble : Black Panther

Outstanding Ensemble, Drama Series : This Is Us

Outstanding Stunt Ensemble, Comedy : Glow