Box Office 'Glass' nek keh zo an la awm lo
Scottish actor James McAvoy channa 'Glass' chuan North American Box Offic-ah ro a rel chhunzawm zel a, a zawnin kar hnih chhung No.1 a hauh tawh.
Kar hmasa khan $mtd 40 lalutin dinhmun sang ber a lo luah tawh a, tun weekend khan $mtd 19 lalutin a dinhmun ngai hi a luah leh thei a ni. Drama/fantasy film Glass hi The Upside leh Aquaman ten an dawt a ni.
Glass a hit
Scottish actor lar James McAvoy leh British-Argentine actress Anya Taylor-Joy te channa hi tunlai film chhuak thar zingah chuan en hlawh ber niin, sum pawh a hailut hnem hle. He film hi January 18 khan US-ah tlangzarh a ni a, Box Office aṭanga a sum lakluh tawh chu $mtd 59 a tling tawh a ni.
Glass hi American filmmaker M. Night Shyamalan kutchhuak niin, ani hi Unbreakable (2000) leh Split (2016) te lo direct tawhtu kha a ni. He film-ah hian American actor Samuel L Jackson chuan mit a tlung hle a, Bruce Willis leh Sarah Paulson te pawh a tikimtu satliah an ni lo tih a lang.
The Upside bawk
American comedian Kevin Hart leh Australian actress Nicole Kidman-te channa The Upside hian kar hmasa khan Box Office-a sum lalut hnem pahnihna a ni a, tun ṭumah pawh a dinhmun ngai a luah leh. Sum lakluh tam lamah erawh kar hmasa a pha lo thung a, $mtd 12.2 a lalut pha ṭawk a ni.
Box Office-a hun eng emaw chen No.1 lo hauh tawh Aquaman chu top 3-ah a la inham ṭang zui zel a, a sum lakluh erawh a kiam ve hret hret. Kar liam ta chhung khan $mtd 7.3 a lalut leh a, tihian a sum lakluh tawh zawng zawng chu $mtd 316 zet a tling tawh a ni.
American star Jason Momoa leh Amber Heard te channa Aquaman hi The Kid Who Would be King leh Spider-Man: Into The Spider-Verse-ten an dawt a, an sum lakluh zat chu $mtd 7.2 leh $mtd 6.1 a ni. Green Book, A Dog's Way Home leh Serenity te chu sum lalut tam zual zingah telin, Escape Room leh Dragon Ball Super: Broly te chu top 10-ah an inhlangkai ve bawk.