India-ah Honor View 20 tlangzarh

Smartphone dang te aia camera ṭha chungchuang tak tura duan Honor View 20 chu nimin khan India-ah tlangzarh a ni ta. A man hi Rs. 40,000 vel ni tura beisei a ni. 

Chinese Smartphone siamchhuaktu lar Honor chuan an model thar hi nimin khan Gurugram, Haryana-ah an tlangzarh a, Amazon-ah online-a lei theih tura chhawpchhuah nghal a ni. Honor View 20 hi a screen 6.4-inch niin, TFT LCD display bakah full HD a ni. 6GB RAM - 64GB internal storage leh 6GB RAM -128GB internal storage te a awm a ni. A battery pawh a rintlak viau dawn a, 4000mAh lai a ni. 

A camera mawlh hi mipui hiptu a ni a, 48-megapixel + TOF 3D dual rear camera niin, a hma lam pawh 25-megapixel zet a ni. Thlalak lama tui mite tan pawh hmantlak viau tura ngaih a ni a, lei manhla tur tak a ni. 

Honor View 20 hi Midnight Black, Phantom Blue leh Sapphire Red colour te a awm ang.