Social media vanga buai Bella Thorne

Social media hi ṭang­kai viau bawk mah se, mi tam tak tan chuan harsatna thlentu a lo ni reng mai. Chung zingah chuan American actress Bella Thorne pawh a bang bik lo a, a nun a zalen loh thu a sawi chhuak. 

Kum 21 mi Bella Thorne hi Gay Times magazine chuan February cover girl atan an hmang a, he magazine-ah hian social media avanga buaina a tawh hrang hrangte chu chhiar tur a awm a ni. Chutih rual chuan social media avanga tun hun thleng thei a nih thu leh sum hmuh nan a lo hman tawh ṭhin thu a sawi. 

'Famous In Love' star chuan, "Ka hun awl tam zawk chu social media khawih nan ka hmang a, a bik takin Instagram ka hmang nasa hle. Chunga ka thil hmuh leh hriat te chuan a changin hlimna min pe a, a changin lungngaihna min thlen. Rilru leh ngaihtuahna thlenga a buai map chang pawh ka tawng fo a, ka tan chuan harsatna min thlentu lian tak pakhat a ni," tiin a sawi. 

Bella Thorne chuan kum 18 mi lek a nih lai aṭang tawhin Instagram chu sum lakluh nan a lo hman tawh ṭhin tih a sawi a, "Ka tan chuan 100% job min petu a ni" tiin a sawi. Instagram aṭanga a sum thawh­chhuah hmangin in a lei theih phah niin a sawi bawk.