iHeart Living Room Concert aṭangin $mtd 8 hmuchhuak
Coronavirus dona kawnga sum tuakna tura milarte'n an in aṭanga concert an neih, iHeart Living Room Concert Pathianni zana neihah khan $maktaduai 8 lai an hmuchhuak.
Elton John host-na hnuaia neih iHeart Living Room Concert for America hi Fox broadcast network chuan live-a pechhuakin darkar khat chuang zet hun an hmang a, TV kaltlangin thlirtu mi maktaduai 8.7 lai an awm niin Fox chuan a sawi.
Zaithiam lar tak tak inlan zingah Billie Eilish, Backstreet Boys, Lizzo, Alicia Keys, Mariah Carey, Lady Gaga leh Tim McGraw-te pawh an tel a, an awmhmun aṭang ṭheuhin an zai a ni.
Fox bakah hian iHeart radio station chuan America ram puma ngaihthlak theih turin a pechhuak bawk a, an sum hmuhchhuahte hi Feeding America leh First Responders Children’s Foundation-ahte an pe ang.
iHeart Radio chuan an YouTube channel-ah stream theihin an dah chhunzawm a, an ram huna Nilaini thlengin pawisa pekna hun an la hawng dawn. Thawhṭanni thleng khan $mtd 8 hi an hmuchhuak tawh a, household product giant Procter & Gamble chuan $500,000 lai an pe bawk.