'I Love Rock 'N' Roll' phuahtu a thi
Joan Jett-in thiam taka a sak ṭhin, zaithiam dang pawhin an cover nasat em em 'I Love Rock 'N' Roll' phuahtu Alan Merrill chu Pathianni khan Covid-19 vangin kum 69 mi niin a thi.
A fanu Laura chuan a pa thih chungchang hi tarlangin, tunhnai lawkah pawh khan show-a inlan a play tur khawpin a la chak ṭha hle tih a sawi.
Laura chuan chhungkaw dangte chu fimkhur tura chah zuiin, "In chhungkuaah a thleng thei lo emaw in ti a ni maithei, mahse a thei a ni.
"Inah awm rawh u, in tan a nih loh pawhin midang tan tal. Ka pa tan chuan he thil hi thil tak tak a ni," tiin a sawi.
I Love Rock 'N' Roll hi kum 1975 khan Arrows chuan an sa hmasa a, mahse kum 1982-a Joan Jett-in a sak hnu khan khawvel dengchhuak khawpin a lar chauh thung.
Britney Spears-in a cover pawh khan a lar hle a, Korean film star lar Lee Da Hae pawhin Korean ṭawngin a cover tawh bawk a, khawvela hard rock hla lar ber zinga mi a ni.