Super Bowl-a inlan tur Maroon 5 inbuatsaih ngawrh

Super Bowl Halftime Show-a perform tur Maroon 5-te chuan inbuatsaihna ngawrh takin an kalpui a, a ṭha thei ang bera inlan an tum thu an sawi. Hetih lai hian tun hnaia press conference an neih tur chu cancel a ni a, social media kaltlangin an inlan zawk dawn niin NFL lam chuan an tarlang. 

Hemi chungchangah hian National Football League (NFL) chuan thuchhuah siamin, "Maroon 5-te hi Pepsi Super Bowl LIII Halftime Show atan an inbuatsaih ngawrh hle a, a hringa hrana press conference-a inlan tura beisei chi pawh an ni lo. Show-ah an inbuatsaihna leh an kamchhuak-te tihchhuah a ni zawk ang," tiin an tarlang. Hetih lai hian Maroon 5 lam chuan thuchuah an la siam lo thung a, press conference-a an inlan lo hian sawi a hlawh hle. 

American pop rock band lar Maroon 5-te hi Super Bowl LIII Halftime-a inlan tur zinga thawm nei lian ber an ni a, mipui hmuh chak pawh a ni. An inbuatsaihna footage hrang hrangte chu social media kaltlangin an tarlang a, fan-te pawh an phur tawh hle. 

Khawvel ennawm ropui berte zinga mi Super Bowl Halftime Show-ah hian Maroon 5 bakah, American rapper Travis Scott leh Big Boi-te an che dawn bawk. 

American football game ngaihhlut National Football League (NFL) championship hi February 3 hian  Mercedes-Benz Stadium-ah khelh a ni ang.