VLCC Femina Miss India World 2020 Manasa Varanasi

VLCC Femina Miss India World 2020 chu Nilaini zanah khan a hmawr bawk a ni ta a, Telangana miss, Manasa Varanasi chu VLCC Femina Miss India World 2020 atan thlan a ni. Haryana mi Manika Sheokand chu VLCC Femina Miss Grand India 2020 atan thlan a ni a, Uttar Pradesh aiawh Manya Omprakash Singh chu VLCC Femina Miss India 2020 - Runner Up a ni thung.

Miss India organization chuan hripui leng karah hlawhtling takin VLCC Femina Miss India 2020 thlanna hi an nei a, state hrang hrang aiawh nula duhawm rual intihsiaknaah Telangana nula kum 23 mi Manasa Varanasi chu a ṭha berah an thlang ta a ni.

VLCC Femina Miss India 2020 pageant hi Covid-19 vangin kum dang angin an kalpui thei lo a, round ṭhenkhat chu virtual-in an buatsaih phawt a, nula duhawm rual 31 zinga a 15-te chuan semi-final lutin Mumbai-ah an intihsiak leh a, chung zingah chuan Manasa Varanasi tluk zo hi an awm ta lo.

Grand Finale hi Hyatt Regency Mumbai-ah neiin kumin hi Femina Miss India beauty pageant vawi 57-na a ni tawh a, Miss World Asia 2019 leh Miss World 2019 second runner-up Suman Rao chuan Manasa Varanasi hi crown a khum tir a ni.

Miss India pageant 2020 finale-ah hian Vaani Kapoor chu a perform a,  Aparshakti Khurrana chu host a ni bawk. February 28 hian Colors TV channel-ah grand finale hi an pechhuak ang.

70th Miss World pageant-a India ram aiawh tur ni ta Manasa Varanasi hi kum 23-a upa a ni a, financial information exchange analyst niin, Vasavi College of Engineering chhuak a ni. A san zawng chu 5'9.5" a ni bawk. Lehkhabu chhiar ngaina mi a ni a, rimawi ngaithlak nuam a tih bakah yoga a ti ṭhin. 

"Beauty queen zawng zawng zingah chuan Priyanka Chopra hi ka tan chuan a entawn tlak ber a, a chhan chu thil thar zawng duh mi a nih vang a ni," tiin Priyanka a ngaihsan thu interview-ah a sawi.