Ranaut channa 'Manikarnika' a hit

Bollywood-ah film chhuak thar a awm a, chu chu Manikarnika: The Queen of Jhansi a ni. Kangana Ranaut channa hi a hit rem rem hle a, tunlai Bollywood film en hlawh ber a ni mek. 

Darkar hnih leh minute 28 zeta sei Manikarnika hi January 25 khan tlangzarh a ni a, a tir phat aṭangin a boruak a lian nghal hle. He drama/action film hian tlangzarh ni la lain cheng vaibelchhe 8.75 a lalut a, entu a ngah thawhkhat hle tih a lang. 

India ram hmun hrang hrangah chhuah chho mek zel niin, ni nga a liam meuh chuan vbch 50 chuang a lalut der a ni. January a liam meuh chuan vaibelchhe 70 dawn a lalut a, a 'hit' tih loh chi rual a ni lo.  

Manikarnika: The Queen of Jhansi hi Indian film director Krish kutchhuak a ni a, Kangana Ranaut chuan director hna a thawk tel bawk. Kum 31 mi Ranaut hian theihna sang tak a nei tih pho­langin, a changtu zing­ah a tel bakah film siamtu nih a fawm bawk. Bollywood khawvela chawimawina hrang hrang lo dawng tawh Ranaut hi - Ankita Lokhande, Richard Keep leh Jisshu Sengupta-te nen an changho a, entute mit a titlai hle a ni. 

Manikarnika hi tun hnaia film chhuak thar dang Uri: The Surgical Strike nen an inbei tawk chho viau a, sum pawh an hailut hnem hle. Hetiang karah hian Anil Kapoor leh Sonam Kapoor-te channa 'Ek Ladki Ko Dekha Toh Aisa Laga' chu a lo lang ve mek bawk a, India Box Office a ngaihnawm chho viau dawn a ni.