Beatles documentary film-ah Peter Jackson?

Film a chang dawn tihna lam a ni lo va, a siam hna a thawk zawk dawn. BBC chuan 'The Lord of the Rings' film siam­tu Peter Jackson chuan English rock band lar The Beatles documentary film a direct dawn niin an tarlang. 

The Beatles hian kum 1970 khan an studio album 12-na leh hnuhnung ber ni bawk 'Let It Be' chu an tichhuak a, hemi hnu hi chuan an album dang hmuh tur a awm tawh lo. He an album hnuhnung ber bechhan hian documentary film siam a ni dawn a, New Zealand film director lar Peter Jackson chuan a buaipui dawn a ni. 

The Beatles hian 'Let It Be' album buaipui hian kum 1969 khan studio an luhchilh zak zak a, chung hun laia studio footage hrang hrangte chu an lo la kawl ṭha khiau mai. Chumi hmang chuan documentary siam a ni dawn a, John Lennon leh Paul McCartney-te ho chetla lai hmuh tur a awm dawn a ni. 

An sulhnu tam tak hmuh theih tura chhawpchhuah a ni leh tur hi English rock band The Beatles ngainatute tan chun chanchin lawmawm tak a ni ngei ang. The Lord of the Rings bakah Hobbit film-te pawh losiam tawh Peter Jackson kut­chhuak a nih dawn bawk avangin en man hla tur tak a ni - chutih rual chuan ti­chhuah hun tur erawh tarlan a la ni lo thung.