Zote Honda Ṭhazual Lengzem No. 1-ah Seraphic Choir 'Medley'
Zote Honda Ṭhazual Lengzem chart-ah Seraphic Choir-te chu pakhatna an ni a, pahnihnaah hian Priscilla Fanai 'Ka duh leh duh loh' chu awmin, HT Lalthanzami 'Di rialin' chu pathumnaah a awm bawk.
Seraphic Choir-an thiam ber
Chart-ah hun rei tak chhung an cham tawh a, hmasawn zelin tunah phei chuan thlan hlawh ber an ni ta a, Chart-ah ro an rel der a ni.
June thla tir lamah khan Seraphic Choir-te hian 'Medley' hi an tichhuak a, TV lamah pawh an zai hmuh tur a awm deuh reng a, thlan an hlawh hle tih a hriat.
He hlaah hian hla hlui pathum- Rimawi Ram, Lentupui leh Darmani Zai-te chu an medley-a, a mawi phian. An zaithiam piah lamah an music video pawh a hmuhnawm hle a, 'classic' raiha music video an siam hian hmuh a tinuam zual hle a, a hla nen pawh a inhmeh hle a ni.
Music video hmuh nuam tak hi RDS Shots kutchhuak a ni a, Seraphic Choir-te hian hla paruk tichhuak tawhin sawm an hlawh hle. Tunah hian hmachhawp an nei mek bawk tih an khaipa Chd-a chuan Vanglaini a hrilh a, hla thar kan hmu thuai turah beisei ang.
Priscilla-i leh HT Lalthanzami-ten thlan an hlawh zel
Chart hmasaa pakhatna dinhmuh hauhtu Priscilla Fanai 'Ka duh leh duh loh' chu pahnihnaah a tla thla a, thlan erawh a la hlawh hle thung. 'Ka duh leh duh loh' music video hmuhnawm zia sawi nawn a ngai lo a, dinhmun sang tak a la luah chhunzawm hi a mak lo hle a ni.
Pathumnaah hian HT Lalthanzami 'Di rialin' chu a awm ve leh bawk a, ani pawh hian hma a sawn zel a, eng chen nge a thlen dawn tih chu hriat a chakawm tawh hle. Pakhatna dinhmun ṭum hnih ngawt luahlum thei Josephine Lalawmpuii 'Khep khep maia' chu palinaah awmin KR Robert 'Hello' chu Top 5-ah a lang ve bawk.