Good Boys-in sum lalut tam ber
Box Office-ah film tharin ro a rel a, chumai ni lo in sum lalut zual 10 zingah film thar pali lai an tel leh bawk. Chart hmasaah pawh khan film thar sum hailut hnem zual zingah an lang nual tawh bawk a, movie tuipui tan chuan thu lawmawm tak a ni ngei ang.
Hobbs & Shaw aia palian naupang pathum
Gene Stupnitsky film, Good Boys hi Zirtawpni, August 16 khan US-ah tlangzarh a ni a, kar tawpah khan US-ah hian theatre 3,204-ah chhuah hman niin $21,402,605 zet a lalut a, Hollywood palian pahnih channa Hobbs & Shaw a nekchhuak.
Comedy film a ni a, mipa naupang pathum, a film hming ang lo taka 'Good boys' lem lo tak takte chettlatna nuihzatthlak tak a ni. A trailer ringawt pawh a nuizatthlak hle a, a hit viau ang tih a hriat theih. March 11-ah daih tawh khan premiere a ni tawh a, mahse Zirtawpni liam ta khan tlangzarh erawh a ni chauh thung.
Film siamna budget hi $mtd 20 a ni a, US-a an sum lakluh ringawt pawh hian an budget chu a khum nghal der. Fast & Furious Presents: Hobbs & Shaw nekchhuak thei film hi film hmuhnawm tak a ni tih a hriat nghal mai a, en a chakawm tawh hle a ni.
Fast & Furious Presents: Hobbs & Shaw a hit zel
Kar hnih lai Box Office-a rorel thei Fast & Furious Presents: Hobbs & Shaw chu sum lalut tam ber dawttu a la ni pha a, $mtd 14 chuang a lalut. Mahse chart hmasaa a sum lakluh aiin 43.9% zetin a sum lakluh a tlahniam tawh thung a, $mtd 200 senga film siam hian kar tawp chart-ah khan $mtd 20 senga film siam a ngam ta lo a ni.
The Lion King (2019) chu pathumna a la ni pha ve bawk a, a la hit reng zel ti ila kan sawi sual tam awm lo e.
Film thar bawk
Chart hmasaah khan film thar cheṭha a tam thu kan ziak tawh a, tun ṭumah pawh hian Box Office top 10-ah hian film thar pali zet an tel leh.
The Angry Birds Movie 2 chu palina a ni a, 47 Meters Down: Uncaged chu pasarihna niin Blinded By the Light chu 10-na a ni ve bawk.