BANGLA NO 9 Trailer en theihin a awm ta

Mizo mini series thar tur Bangla No 9 trailer chu nimin khan en theih turin chhawp chhuah a ni ta, mi tam tak chuan an en chak nghal hle dawn tih a chiang.

Mizo film hi eng emaw zat awm ve tawh mah se 'horror' film hi kan la ngah lo hle. Tin, kan neih tawh angte pawh thiamna leh kan khawl neih ṭhatin a tlin loh avangte pawh a ni mah na, duhthu a sam zan lo ṭhin. Tun ṭuma Leitlang Pictures series tihchhuah tur erawh hi chu Mizoin thlahrang film lama bung thar kan kaina tur a ni dawnin a lang. Trailer tawite aṭangin video leh audio editing fuh zia  a lang a, kan ram tlin tawkah chuan a aia ṭha a la awm lo ang a, tih tur khawp a ni.

Film chan hautak tur a ni tih a lang chiang nghal a, mit a tlai ang. Bangla pakhata hmeichhia thlahrang an hmuh ṭhin chungchang chhuina film a ni dawn tih a hriat theih a, action scene a awm nual dawn a nih hmel bawk. Love story inphum zeuh pawh a awm dawn niin a lang.

Bangla No 9 hi Android, iOS leh Windows platform-ah Lersia application kaltlangin a ruala pek chhuak tum a ni a, Google play store-ah he application hi February 20 hi chuan hman theiha chhawp chhuah hman an tum bawk. iOS hmangtute tan pawh Apple app store-ah hemi ni vekah hian dah chhuan hman an tum bawk a, computer hmanga en duh tan an website-ah a en theih thung ang.

A film siamtu Leitlang Pictures lam pawhin an film siamah hian beiseina sang tak an nei tih Vanglaini an hrilh tawh a, online streaming app hmanga Mizo film tlangzarh hmasak ber tur a nihna ringawt pawh hi a hlu hle. OST pawh kan hmu thuai dawn a nih hmel a, OST satu tur pawh tudang ni loin Praise On star Arini a ni dawn. Karleh lamah hi chuan kan ngaihthlak hman a beiseiawm. Mizo entertainment khawvel hma hun a eng hlein a hriat a, Netflix leh streaming platform dang kan hlut ang bawkin kan hnam kut chhuak ngei Lersia app. pawh hi lo hlut ila a ṭha hle ang.