Zorimawi rohlu E Lalchhuanawma a thi

Mizo guitarist ṭha ber pawl E Lalchhuanawma chu nimin zingah khan kum 55 mi niin stroke vangin a thi.

E Lalchhuanawma, Pachhuana tia hriat lar hi Sweet Combination, Prisoners, Harvest Ministry, Tornado leh Forever Young-ahte a tel ṭhin a, Mizo rimawi khawvelah sulhnu a hnutchhiah hnem hle a ni.

Kum 1996 khan a chenna New Street, Mission Vengah RB recording studio a siam a, he studio aṭang hian Zoram pumin kan hriat album eng emaw zat tihchhuah a ni. Chung zingah chuan Lalrindiki khiangte album lar 'Min dem lul suh' leh Lallungmuana album  'Daisy' tihte pawh kha a tel.

RTC Lalduhawmi album lar tak 'Chatuan Lal lian' a music-te kha Pachhuana kut chhuak hi a ni a, lengzem hla lar tak 'Tuar a har ngei e' tih hla thluk siamtu kha a ni bawk. Pachhuana hi kum 14 vel lek a nih lai aṭangin concert-na velah mipui hmaah a inlan ṭan tawh a, guitar a thiam piah lamah hian Hnahtum, Phaiphuleng, keyboard leh drums-te pawh a play thei vek.

Kum 1992 khan Zothanchami nen inneiin, fa pali an nei a, tu pathum a nei tawh bawk. Nimin tlaiah khan a chenna inah vui liam a ni ta a ni.