Valentine's Day puala hla thar tichhuak turte

A farnu Mazuali K nena 'Hringnun' hla hit tak mai an tihchhuah hnuah Masanga K chuan naktuk Valentine's Day ni takah hian hla thar a tichhuak dawn.

'Hringnun' hla an tihchhuahna channel 90's K YouTube channel-ah bawk a hla thar hi a chhawp chhuak dawn a, a ngaihnawm leh hle turah beisei ang. A hla hming chu 'Duhlai' tih a ni a, Sawmsawma phuah niin Ephraim Malsawma kut chhuak music ngaihthlak tur a awm dawn bawk nen beng a fah hle ang tih a sawi ngam a, recording chu Swordtune record-a a tih ni thungin a farnu nena an zai dunna tih lohah chuan ama puala a music video hmasa ber tur a ni.

Music video hi Zothlir kut chhuak a ni. Zothlir hi Grace 10:45 music video hmuhnawm tak 'Kumtluangin' tih siam saktute tho kha niin Kimkima pawhin a lo thawhpui fo tawh ṭhin Reuben Lalmalsawma production company a ni a, belhchian a dawl a, Masanga K 'Duhlai' music video pawh hi a hmuhnawm hle ang tih a chiang.

'Duhlai' hi naupan lai aṭanga ṭhian inkawm chho, an puitlin hnua inngaizawng chho ta lam tarlanna hla a ni dawn tih Masanga chuan a sawi a, Mizo zingah chuan hetiang lam hla hi a la tam vakin a rinawm loh.

Ngaihzawng thlak zung zung loin kan inkar boruak ṭha lote siam ṭhat tum zawk ila, chu chu hmangaihna pawh a ni zawkin ka hria - Jaui 

Ṭhazual award 2020-a Best artist lengzem female award dawngtu Jaui chuan zanin hian hla thar 'Dam chhan' a tichhuak dawn a, Zonet leh a YouTube channel lamah thlira ngaihthlak theihin a awm ang.

'Dam chhan' hi Faith Lalduatmawii hla a ni a, music hi chu Jaui'n a hla danga a thawhpui fo ṭhin Hope Music kut chhuak a ni leh dawn. Music Video chu Austin Bilywaif direct a ni dawn thung a, social media lamah ṭhenkhat chuan a teaser pawh kan hmu tawh mai thei. Jaui zai ngainatute tan chuan nghahhlelhawm tur tak a ni.

"Inngaihzawnna thuah ngaihzawng thlak zung zung loin kan inkar boruak ṭha lote siam ṭhat tum zawk ila, chu chu hmangaihna pawh a ni zawkin ka hria," tiin Jaui chuan V-Day lo thleng tur behchhanin a ṭhalai puite hnenah Vanglaini kaltlangin thu a chah.

Ngaihzawng hrang hrang zingah pawh Khuanu ruat sa hi chu a awm rinna thu lam hla a ni a, chu an tana ruat, sap ṭawng takin an 'soulmate'-te nena an inhmangaihna leh inhriatthiam tawn chhohna lam hla a ni e, tiin hla phuatu Faith Lalduatmawii chuan a hla chungchang hi a sawi ve bawk.