GOT Prequel House of the Dragon-ah Steve Toussaint, Eve Best, Rhys Ifans, Sonoya Mizuno

Game of Thrones prequel series House of the Dragon-ah chang tur zingah Steve Toussaint, Eve Best, Rhys Ifans leh Sonoya Mizuno-te pawh an tel dawn tih HBO chuan an puang.

Steve Toussaint chu Lord Corlys Velaryon lemah a chang dawn a, Princess Rhaenys Velaryon lemah Eve Best chu chang dawn thungin, Otto Hightower lemah Rhys Ifans a chang ang a, Mysaria lemah Sonoya Mizuno a chang thung ang. Heng mi palite hian a hmaa an lo puanzar tawh Paddy Considine, Olivia Cooke, Emma D'Arcy, leh Matt Smith-te chu an zawm ve dawn ta a ni.

HBO chuan an character turte an sawi fiah nghal bawk a, GOT fan-te tan chuan hei hi thil phurawm tak tawh tur a ni. House of the Dragon-a chang tur tarlan tharte hi lemchan lama sulhnu nei ṭha tak tak tawhte an ni hlawm. Toussaint hi Prince of Persia: The Sands of Time aṭang khan kan hriat tawh a rinawm a, Eve Best hi chu Netflix-a tunlaia lar tak Fate: The Winx Saga aṭanga kan hriat tawh a rinawm bawk.

Ifans hi The Amazing Spider-Man-a The Lizard lema chang kha a ni a, Mizuno hi chu Crazy Rich Asians leh Ex Machina velah khan a chang tawh a ni. Game of Thrones hma kum 300 vela thil thleng anga chan tur House of the Dragon hi George R. R. Martin lehkhabu ziah Fire & Blood behchhana siam a ni dawn a, April thla aṭang hian London-a Leavesden Studio-ah an chang ṭan dawn a, United Kingdom leh Spain velah an chang ang.

•    Steve Toussaint chu Lord Corlys Velaryon aka 'The Sea Snake' lemah a chang dawn. House Velaryon lord, House Targaryen tluk zeta upa Valyrian thlah kal zel 'The Sea Snake' hi Westeros-ah chuan lawnga zinkual ṭhin mi hmingthang a ni. A in chu Lannister-te aia ram hausaah a sa a,  khawvela lawng sipai chak ber nei anga ngaih a ni.

•    Eve Best chu Princess Rhaenys Velaryon lemah a chang ang. Lord Corlys Velaryon nupui, dragonrider 'The Queen Who Never Was' tia sawi ṭhin a ni. Lal ni tur a ni a, mahse Great Council chuan a cousin Viserys (Considine) chu mipa a nih avangin an duhsak zawk a, chuvang chuan lal a ni thei ta lo.

•    Rhys Ifans chu Otto Hightower lemah a chang dawn. Hand of the King, a lal tana mi rinawm tak a ni. Lal thachhang dawltu ber a nih angin lal unaupa Daemon chu an ram tana mi hnawksak ber, an lal tana pawha hlauhawm a ni tih hretu a ni a, Otto hi  Alicent Hightower pa a ni.

•    Sonoya Mizuno chu Mysaria lemah a chang dawn a ni. Engmah nei loin Westeros-ah a thleng a, vawi tam tak hralh kual tawh a ni. Westeros a thlen hnuah erawh Prince Daemon Targaryen ṭhian rin ber a 

ni thung.