Rock & Roll Hall of Fame 2021 nominee-te chu...
Kar hmasa lamah khan Rock & Roll Hall of Fame 2021 nominee puan a ni a, chung zingah chuan Rage Against the Machine, Foo Fighters leh Iron Maiden-te pawh an tel.
Jay-Z, Carole King, Tina Turner, Mary J. Blige, Kate Bush, Devo, The Go-Go's, Chaka Khan, Fela Kuti, LL Cool J, New York Dolls, Todd Rundgren leh Dionne Warwick-te pawh nomination list-ah hian an tel bawk.
Rimawi huanga chawimawina ngaih hlut Rock & Roll Hall of Fame-a kumina an lakluh turte chu May thlaah puan an ni dawn a, Induction ceremony chu Cleveland, Ohio-ah favangah neih a ni ang.
Kuminah hian nominee hi 16 lai an awm a, kumdang thlir chuan a tlangpuiin mi panga emaw paruk emaw bak kum khatah an lalut ngai meuh lo. Chuvang chuan heng milar tak tak zingah hian a tam zawk hi chu an la chhawk leh a rinawm.
Hming lang nawn an awm!
Tina Turner leh Carole King-te hi chu a hmain Rock & Roll Hall of Fame-ah hian lakluh an ni tawh a, mahse solo artist anga lakluh an ni lo. King hi kum 1990 khan Gerry Goffin rualin songwriting team anga lakluh a ni a, a kum lehah
Turner hi Ike Turner nen duo-a lakluh an ni ve thung. Kuminah hian lakluh an nih leh chuan hmeichhe artist vawi hnih lakluh pahnihna leh pathumna an ni dawn tihna a ni.
Stevie Nicks kha hmeichhe artist vawi hnih lai Rock & Roll Hall of Fame-a lakluh hmasak ber a ni a, Fleetwood Mac member anga lakluh a nih bakah solo artist angin lakluh a ni leh.
Foo Fighters member Dave Grohl pawh hi Nirvana member anga lakluh a lo ni tawh a, kuminah hian a hming a lang nawn ve leh bawk.