Actor sum lalut hnem ber Dwayne Johnson

Forbes chuan kumtina a tihchhuah ṭhin angin mipa, lemchan thiam sum lalut hnem list a tichhuak leh a, Dwayne Johnson (The Rock) aia sum hailut hnem an awm lo. An sum lakluh hi nikum chhunga an sum lakluh aṭanga teh a ni. 

Dwayne Johnson hi nikum khan actor sum lalut tam ber pahnihna a ni a, kumina pakhatna ni mah se nikum aiin a sum lakluh a tlem thung. Nikum list-ah khan $119m a lalut a, kuminah erawh $89.4m a lalut thung. Hetichung hian kumina sum lalut hnem ber a ni thei a, nikum lam aiin actor-ten kumin hian sum an lalut tlem a nih hmel.

Actor-te sum lak­luh hi an film chana an hlawh chauh en a ni lo a, thildang aṭanga an sum hailuhte pawh chhut tel vek a ni. Johnson hian Under Armour nena an thawhdunna aṭang ringawt pawhin sum a hailut tam hle a, a channa Fast & Furious presents: Hobbs & Shaw chu tunlaia film lar ber zinga mi a ni mek bawk. Film hit tak Fighting with My Family leh Shazam!-te kha a produce an ni bawk a, kumin kumtawp lam hian a channa tho Jumanji: The Next Level chu tihchhuah a ni leh dawn bawk a ni. Johnson sum lakluh hi a la pung thur thur dawn niin a lang.

Nikum lama actor sum lalut hnem bera puan George Cloo­ney chu kumin hian top 10-ah pawh a lang phak lo. Heihi a tequila company tlakhniam nasat vang nia tarlan a ni.

Actor sum lalaut tam ber pahnihna chu Chris Hemsworth a ni a, ani pawh hian $76.4m zet a lalut. Avengers star hian sum a lalut hnem hi thil mak a ni lo a, tunhnaiah a inlanna film apiang a hit em em vek a, Thor movie thar a chan leh tur pawhin ngaihven a hlawh leh tawh hle.

Avengers star tho Robert Downey Jr chu pathumna a ni bawk a, Avengers aṭanga a sum lakluh hnem zia leh Avengers: Endgame-a fan-te rilru hnehtu ber a nihna ngaihtuah chuan thil awm tak a ni.

Bollywood star Akshay Ku­mar chu palina a ni pha a, hei hian Bollywood-ah sum chevel a tam zia a tilang chiang hle. Akshay hi tunge a nih sawinawn a ngai lo ang, a sum lakluh zat hi $65m nia chhut a ni.

Jackie Chan chu pangana a ni ve bawk a, Hollwood-a hnuhma nei ṭha tak Hong Kong actor hi kum 65 lai a ni tawh a, hetichung hian sum lalut tam ber zingah a la lang phak. A kum tam tawh mah se amah erawh a la tar lo hle tih a lang.

'A star is born' vanga tun­hnaia lar thar em em, Avengers star Bradley Cooper chu parukna a ni ve bawk a,  comedian Adam Sandler chu pasarihna a ni bawk.

'Captain America' Chris Evans chu pariatna niin, 'Ant Man' Paul Rudd chu pakuana a ni  a, 'Aladdin' star Will Smith chu top 10 khartu a ni ve bawk a ni.

Avengers hit zia kan hre tlang a, Avengers: End Game phei chu khawvel film siam tawha sum hailut tam ber record chelh mektu a ni. A film a hit bawk a, Forbes-in actor sum lalut tam a tihchhuahah pawh hian top 10-a panga ṭhawt chu Avengers actor an ni. Chris Hemsworth, Robert Downey Jr, Bradley Cooper, Chris Evans leh Paul Rudd-te hi Avengers star vek an ni a, hei hi Avengers ropuina belhchhahtu a ni ngei ang.

1    Dwayne Johnson    $89.4m

2    Chris Hemsworth    $76.4m

3    Robert Downey Jr    $66m

4    Akshay Kumar    $65m

5    Jackie Chan    $58m

6    Bradley Cooper    $57m

7    Adam Sandler    $57m

8    Chris Evans    $43m 

9    Paul Rudd    $41m 

10    Will Smith    $35m