Bruno Mars-in $mtd 1 pek tiam

Grammy Award hial pawh lo dawng tawhtu Bruno Mars chuan MGM Resorts Foundation tan $mtd 1 a pe dawn tih a sawi.

Bruno Mars hi  Park MGM theatre performer a ni a, MGM hnuaia hnathawk, coronavirus leng vanga sum lama harsatna tawkte tan pawisa hi a pe dawn a ni.

LAs Vegas-a Park MGM-a The Park Theater-ah kum 2016 aṭang khan Mars hi hun eng emaw bikah a perform ṭhin a ni. Mars aiawha thuchhuah siamtu chuan, "MGM hian album thar a buaipui laia gig a neih fo theihna turin Mars hi hun ṭha an siam sak a ni. Las Vegas khar a nih takah chuan, Bruno hian a lawmzia lantir let a duh a ni," tiin ṭanpuina a pek tur chungchang hi a sawi.

A pawisa pek hi The MGM Resorts Foundation’s Employee Emergency Grant Fund & Children’s Medical Support Fund-ah a lut dawn a, hemi hmang hian MGM hnuaia hnathawkte chu ṭanpui an ni dawn a ni.

MGM Resorts International President Bill Hornbuckle chuan Bruno Mars-in a ṭanpui tur chu an lawm hle tih sawiin, Mars chu MGM chhungkaw zinga mi anga an ngaih thu a sawi ve bawk.