C Sanga'n YouTube-ah OAC a nei ta A pual music video thar tichhuak

Zaithiam lar thi ta C Sanga chuan Mizo zinga a pahnihna atan YouTube-ah Official Artist Channel (OAC) a nei ta a, Mizo mipa zinga OAC nei hmasa ber a ni.

C Sanga channel hi a nupui Mamuani siam a ni a, OAC hi MDM leh Hlimhlimi channel verification lo dilsak tawhtu, MDM thawhpui Label/Management company St Ange chuan Inrinni liam ta khan a dil sak a, nimin khan an pawm ta a ni.

He channel-ah hian YouTube-in streaming service platform a siam thar YouTube music-a C Sanga zai dah tawhte chu ngaihthlak theih a ni a, YouTube music hmang kher lote tan pawh a ngaithlak theih bawk.

OAC hi artist-te tan bika duan a ni a, January 31 khan Hlim­hlimi chuan lo nei tawh bawkin, MDM pawhin nikum lamah khan verification badge an dawng tawh a ni. 

Nizan khan C Sanga puala music video thar 'Chhuihthangvala' chu Zonet-ah tihchhuah a ni. 

He hla hi  Lalnunmawia (Val­tea) phuah a ni a, music video hi Mawitea Hauchhum, RDS Shots kut chhuak a ni thung. C Sanga'n 2007-a a tihchhuah 'Tawnmang Lasi' album-a mi kha a ni.